top of page

EL KALAVASUCHO.






La eskrita de la semana pasada “LA BÜYÜKADA” izo muncho sükse i fui agradesida por munchos lektores. Esto me motiva i me da plazer. Vos rengrasyo a todos.

Enverano tengo munchas konosidas ke no me veyo en la sivdad, en Anadolu kulubu mos rankontramos.

Syertas konversasyones son byen egzajeradas, si tyenes gana akel diya te puede pasar por teatro.

Un diya de djugeves eskapi de emplear (djugeves ay Pazar en la Büyükada. Tomi el livro i me fui a la plaj.

En meldando mi livro, detras de mi kuatro mujeres, al pareser ke i eyas se fueron al pazar, estan dando reseftas de komidas i dulsuryas i las listas kualo vana gizar para noche de shabat.

La una apenas disho ke merko kalavasas, empeso una konversasyon muy enteresante. “Komo se aze kalavasucho”.

Empesaron a avlar en gritando i todas de una boka

“Yo ago 3 kilos de kalavasa”

“Nooooo 2 kilos es karar “

“Yabasta! 2 kilos a ken abasta”

“Yo meto i kezo blanko i kezo kasher”

“No canim kezo blanko no se mete”

“Yo meto una miğita de pan i 2 guevos”

“Yo meto kuatro guevos”

“Kuatro guevos? Tu no tyenes kolesterol parese”

“Yo la raygo la kalavasa”

“Yo meto un poko de tereot

“Tereot? no le va al kalavasucho”

“Ken disho tereot le va muncho a la kalavasa”

“No ke busha tereot en el kalavasucho”

“Tereot se mete al mujver”

“No! Ken disho? Ya se mete”

“Mi yerno se namora del kalavasucho miyo”

“Mi inyeto no kome tereot”

“No se mete”

“Si se mete”

Este kalavasucho sureyo djusto una ora i medya.

Deshi el livro porke no entendi lo ke estava meldando aunke empesi tres veses la mezma oja. Me fui allado de eyas, kon ironiya les dishe:

“Pardon muncho, yo no entendi, a la fin se mete tereot u no???

La una me respondyo:

“Siguro ke se mete”

“No hanum no se mete”

“Tu mete tereot mira ke savrozo se aze”

“No por sedaka se le va la savor”

“Mira hanum tu toma dos kilos de kalavasa, rayala buena buena…”

Mas no kije oyir kalavasa antes ke salga a fedor, de vista fui me echi de kavesa a la mar.

Otro diya otro grupo, estan konversando, paso una konosida i mos saludo. Apenas abolto la kara:

“Atyo mira, esta no es la ija de Ceni”

“Si eya es”

“Se kito del marido”

“No me digas”

“Deke?”

“Dospues de tantos anyos”

“Komo nada se fue kon otra”

“Esto sera”

Ke desho la ija de Ceni ke tomo la ija de Ceni se avlo djusto dos oras de la ija de Ceni.

A la fin una de eyas estava mas aya, demando

“İjikas ken se kito?”

“La ke paso endagora, la ija de Ceni”

“Ke busha la ke paso endagora no es la ija de Ceni es la ija de İda.”

“Yok canim eya es”

“No es”

“Si es”

Yo yene me fui me echi de kavesa a la mar.

Keridos lektores komo estas tengo munchas avanturas ma por esta semana yabasta.

Ke no me manken, sanas i rezyas ke esten, sin eyas yo kualo ago.







Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page