NANCY WAKE
- 59 dakika önce
- 3 dakikada okunur
Fransya 1943 el anyo el mas oskuro de la okupasyon.
La Gestapo esta bushkando las kazas, oyendo los telefones, supsonando de todos.
Kon esto todo, bushkan una mujer ke no saven el nombre la yaman “raton blanko”.
Kada vez ke ya estan para aferrarla eya parvyene a despareser. La Fransya okupada, metyo una taksa de 5 milyones de frankos por ken la va topar. La suma la mas alta por una espiyona.
Dingunos no saven ken es, envezes se asenta en un kafe toma un vazo de vino i sonriye a un soldado Alman, otro diya, debasho de tyerra ayuda a pilotes britanikos ke salgan de la frontera.
Eya es una mujer de alta sosyetad, se viste syempre elegante, ma en sus fostanes elegantes syempre tyene aldikeras yenas de dokumentos falsos i diferentes idantitades. Dingunos saven su sekreto mezmo sus amigas entimas.
La Gestapo ay mezes ke la bushka, todos los adresos falsos, djusto ke ya la van a topar se van a los adresos ama syempre topan las kazas vaziyas porke el “raton blanko” yene parvino a despareserse.
Una noche en Marsilya un ofisyal le demando sus dokumentos. Eya kon una sonriza ironika le dyo sus dokumentos, el ofisyal sin egzaminar le dyo kamino.
Un chiko yerro es la fin de su ideal i de su vida, akea ora desido de fuyir.
En las montanyas de Pirene kamino entre las inyeves, los kalsados se le arazgaron, los pyezes entezados tres diyas i tres noches vido la muerte kon sus ojos.
Kuando arivo a Espanya enriva no teniya mas de una djaketa ma nunka troko de idea. Eya era myembro de la rezistensya i va kontinuar fin alkavo.
De aya parte a Londra sin durmir ni una noche i se va direktamente a la Dirección de Operaciones Especiales británica i les dize:
“ de vista enbiyame a Fransya i ambezame komo va matar”
En el anyo 1944 torna a Fransya kon parashut. Kaye a un arvole, el lider de la rezistensya la ve i le dize
“ dezeo ke todos los arvoles mos den frutas ermozas komo tu”
Su repuesta
“ desha agora el romantizmo, dame armada”
El lider, primeros tyempos no la keriya akseptar porke era mujer. Una noche, se fueron a bever todos endjuntos i eya parvino a venserlos, bevyo mas ke los ombres i de akea noche endelantre mas no la yamaron “madam” todos estavan a su orden.
Un diya remarka ke todos los kodigos ke teniyan, fueron arovados. De sorte se korto la komunıkasyon kon Londra. Nancy Wake se suvyo a una bisikleta i izo kaji 500 kilometros de kamino. Paso por el kontrol de los Almanes, paso por los perros edukados, tres diyas i tres noches abolto pedales i parvino a topar. Eya no fue solo una mujer korajoza fue una mujer muy eksitoza.
La Gesatapo no parvino a aferrarla ma teniya una grande koz en mano. Si a eya no la estavan topando, van a topar a uno ke kere muncho byen. Lo toparon i lo tomaron a su muy kerido sigundo marido Henry Fiocca i lo mataron.
Nancy Grace Augusta Wake nasida el 30 Ogusto 1912 en Wellington en Nueva Zellanda, eskapada de la universita de periodizmo i grande espiyona ke parvino a realizar 7000 personas kontra Hitler.
Dospues ke eskapo la sigunda gerra mondial, Nancy torno a Australya i se kazo por la tresera vez kon un pilot İnglez nombrado John Forward.
Dospues de la nuerte de John eya torno a İngleterra ma aya aferro una enfeksyon muy grave estuvo en un ospital diyas i diyas.
En el anyo 2011 el 7 del mez Ogusto muryo a los 98 anyos en Londra.
Su testamento era kuando se va murir su puerpo seya kemado i las sinizas ke se echen en Fransya en el sentro Montluchon.
Este testamento se ralizo en el anyo 2013.
Forti BAROKAS
Es ke meldatesh la eskrita de una semana antes?
