MIS REKUERDOS DE PESAH

Del empesijo de la semana ke pasimos, las mujeres judiyas ya se metyeron a gizar, i aparejar por la fyesta. Oy, estos aparejos ya mos empeso a vinir difisil. Mezmo ke kada anyo se estan amiguando mas, por la kontinuasion de muestros kostumbres, i por pueder transmeter muestras tradisyones a muestros ijos, kada mujer judiya esta kontinuando a azer lo ke vido de su madre.

Las fyestas de sukuenta anyos antes eran muy diferentes de las de oy. Akeyos anyos, los judyos de Estanbol moravan en las mezmas partes de la sivdad. Akeyos diyas, muestras nonas no se sintiyan el menester de ambezarsen el turko, porke mezmo los vendedores eran judyos.

Kuando aviya una fiesta judiya, ya se entendiya del momento ke salitesh a la kaye. Los paryentes moravan serka. Todos biviyan la fyesta endjuntos: las famiyas, los vizinos, los vendedores. Kada fyesta teniya su ritual. Era emposivle de no azer estos rituales, porke si mankates de azer una koza, todos lo remarkavan.

Oy, mos estamos keshando de los aparejos de Pesah, i estamos dizyendo ‘La tenemos esta fyesta un poko pezgadika’. Kualo ke dizyeran las mujeres de antes? Kada Pesah, se lavava los perdes, los naperones i se davan a la kola. La kuzina se vazyava entera, los almaryos se alimpyavan bueno, i los papeles de los almaryos i de los kashones se trokavan de muevo. Todas las kalderas se fregavan kon el tel de aliminyum, i kon arap sabunu. Los chinis, las kupas, todo se lavava a la mano. No kaliya ke kede ni una miga de pan. Mi nona mos kontava ke anyos antes, antes de Pesah, a medya noche saliyan a bushkar si kedo una miga de pan en un kanton.

Duspues ke estas limpyezas pezgadas eskapavan, las mujeres judiyas se metiyan a empleyar, i a gizar. El masapan, el dulse blanko lo aziyan en kaza. Los gatos de Pesah, el tezpishti, los guevos kochos, los birmuelikos, las fritadas de espinaka, las albondigas de prasa, las dolmas de tomat, de pipirushka i de kalavasa, los rulikos de espinaka i de berendjena, el kodrero, las patatas al orno. No saviyan lo ke era kolesterol u trigliserit. Las mujeres lavoravan muy duro para pueder resivir los komplimentos de sus maridos, noche de Pesah.

La primera noche de Pesah, lo mas era los grandes de las famiyas ke resiviyan sus ijos, sus ermanos. De munchas semanas antes, kaliya ke se aranjen ande se va fyestar las dos noches de Pesah. Nonos, nonas, madres, padres, ijos, ermanos, inyetos, sovrinos, primos, todos se arekojiyan en la mezma kaza. Ya vos puedesh imajinar la djentorya i el bruyido. Ma kuando se meldava la Agada, no kaliya kitar ni un pi de la boka, sino muestro nono mos mirava del yan.

Noche de Pesah, todos viniyan kon buketos de rozas, u kon un kuti de masapan. Asperavamos ke los ombres tornen de la Sinagoga. Los mansevos no puediyan dizir ‘Esta noche no me kero ir a la Sinagoga’. Duspues ke todos los ombres vinyeron, todos se asentavan al Seder, para dizir la Agada. Todos endjuntos diziyamos la Agada, porke todos ya la saviyamos de kavesa. Kada dos puntos era ‘Se lavaran las manos…’, El legen i el djarro ya estavan pronto. ‘Dan, kinin, sefardan, kinim, arov’. ‘İjikos, no miresh por aya’. I mozotros, los ijikos, miravamos kon kuriozidad del yan, para ver kualo estan echando del djarro aryento del legen. Yo me akodro ke mi nono metiya unas kuantas matzas aryento de una tovaja, lo aziya komo un sako, me lo dava ke me lo meta al ombro, i me diziya ‘Metete esto al ombro, te vas mas presto a Yerushalayim’.

De muestra chikes, ya konosiyamos la sinyifikasion de Pesah, ke es ‘la salidura de Misraim’, la endependensya del puevlo judyo. Kada anyo, selebramos este evento, ke paso miles de anyos antes. Komo meldamos en la Agada ‘En kada jenerasyon, kada judyo es ovligado de repetar lo mezmo, komo si ke fuera ke es el, el ke salyo de Misrayim’.

Kada anyo, komemos el pan ke no tuvo el tyempo de levdar, el harose, i las yervas amargas untandolas al vinagre, por akodrarmos de la amargura de muestros ansestros. Allado del kobran Pesah, metemos un guevo kocho ke semboliza la fekondasyon, i la esperansa. Los kuatro vazos de vino sembolizan la liberdad. Komemos la matza, la lechuga, kontando a los chikos las maraviyas ke izo el Dio, para kitarmos de Misrayim.

Anyos antes, duspues de la Agada, i de la komida de Pesah, kon grande alegriya kantavamos las kantikas de Pesah, todos endjuntos: ‘El Kavretiko’, i ‘Kualo es el Uno’.

Estos rekuerdos de muestra chikes, vana kedar en muestros ojos. Oy, mezmo ke lo estomos azyendo kon muncho mas livyanes, i kon la ayuda de la teknolojiya, muestra erensya rika va kontinuar a pasar a muestros ijos, i a las jenerasyones vinideras.