KIRK DOUGLAS
- 2 saat önce
- 3 dakikada okunur
Kuando entramos al mez de Mayo, el sigundo alhad es “el dia de las madres”.
Los dias spesyales no me afektan muncho ma el dia de las madres no lo aksepto porke los sakrifisyos de las madres no son solo un dia, madre es kada dia madre i mezmo vida entera.
Bryna Sangley a los 19 anyos, la vida la yevo de un kazaliko chiko de Belarus a los Estados Unidos, kon un bilyeto de un ombre nombrado Herschel, para eya no aviya nada mas ke una esperansa ke va tener un futuro mijor. En el anyo 1910 Bryna kon Herschel se kazaron i tuvyeron syete kriaturas, en primero les nasyo sesh ijas. Finalmente les nasyo un ijo i lo yamaron ISSUR en kaza lo yamavan İZZY.
Ma malorozamente en el muevo mundo no toparon lo ke dezeavan. Herschel era un buen komersante de kavayos en Rusia, aki kayo a arekojer syerkol en las kayes para ganar dos groshes. Era kruel i egoisto lo poko ke ganava lo gastava en bokales de bevyenta i en djugos de kartas. Nunka la yamo a Bryna por su nombre, kuando keriya yamarla le diziya “hey! oye tu! ven aki”.
Bryna no saviya meldar i eskrivir. Eya saviya lavorar komo un perro. Para artar su kriaturas, fregava, lavava i espobdjava las kazas de la djente fin ke le saliya sangre de las mano.
Malgrado todo, lo ke ganava no le abastava i syempre estavan ambyertos. En vezes lo mandava a IZZY al kasap djudyo para ke le de unos kuantos guesos para azer a lo manko una supa i artar sus ijos. Los anyos pasaron kualos artos, kualos ambyertos IZZI se izo uno de los mayores estreyas de Hollywood kon el nombre
KIRK DOUGLAS.
En un reportaje disho:
“ en mi chikes vino diyas ke komimos guevos en el plato echos kon agua por no tener leche i azete. Mi madre nunka se kesho i mantuvo su famiya kon fuersa i voluntad. Kuando le dishe ke me kero azer aktor, nunka me refuzo, syempre fue realista, syempre me disho
“ puedes azerlo IZZY, puedes ser lo ke keres”.“Todo lo ke so, todo lo ke gani, es gracias a mi madre."
Issur Danielovitch desho su kaza ke biviya se konvertyo en KIRK DOUGLAS. Djugo los filmos byen konosidos komo SPARTAKUS, komo CHAMPİON i komo estos munchos. Kon tyempo lo konosyo el mundo entero ma el nunka se olvido de su pasado i de su madre ke buyo guesos para mantenerlo.
En el anyo 1955 fondyo su propya produktora i la nombro en onor de su madre “BRYNA PRODUCTİON”
En el anyo 1958, Bryna Production izo konoser al mundo el filmo LOS VİKİNGES. Kırk Douglas la yevo a Times Square la prezento i alumo su nombre kon luzes
“BRYNA PRESENTA LOS VİKİNGES”
Akea mujer ke no saviya meldar i eskrivir, akea mujer ke rogava al kasap ke le de unos kuantos guesos aya fue una produktora yorando por la primera vez lagrimas de alegriya.
Bryna muryo a los 74 anyos allado de su ijo Kırk.
Kırk Douglas muryo en Hollywood a los 103 anyos, el, fue el padre del famozo artısto MİCHAEL DOUGLAS, nunka se olvido de su pasado i de su kerida madre.
Syempre fyestaremos “EL DIYA DE LAS MADRES” kon muestros ijos sin sar i sin mal.
AL VERMOS.
Forti BAROKAS
Es ke meldatesh la eskrita de una semana antes?
Yorumlar