EL BIBERON
- Fani Alyon ENDER
- 2 gün önce
- 5 dakikada okunur
Keridos lektores. Esto segura ke ya konosej el famoso eskrivano
Efrayim Kishon, i ke ya tenej meldado a lo menos unos kuantos de sus
kuentos. Oy, por trokar, kije kontarvos uno de sus kuentos ke traduisi.
Todos tenemos muestros defektos. Algunos beven, otros djugan, otros korren detras de mujeres, otros detras de ombres ...
Mi mujerika es loka por los gatikos.
No de estos de rasa alta ke keren ke los afishugen todo el dia i mauyan el dia entero.
No! Eya es amorosa de los povres gatikos de kayes. Estos ke mauyan amargamente en las puntas de kalejas. Eya, kuando ve un povre gatiko ansi, se le derrite el korason, se le yenan los ojos de lagrimas komo diamantes, se lo yeva a kaza i lo kudya kon grande devosyon asta la manyana kuando se enfasya i le dize a su marido: “Dize me, Porke tengo ke azer siempre todo yo sola?”
Ansi fue kon Pussi.
Este topiziko de pelos mos salyo enfrente en la punta de Herzl i Bialik.
Era pretiko i muy flakito, jugando allegramente kon su kola, -asta ke la vido a mi mujer. Pishin empeso a mauyar kon amargura i se izo de la guerfana.
Entonses vinyeron los diamantes a los ojos i la mujer se derrityo… Yevimos a pussy a kaza kon muncho kudiado y le ofrimos un platiko de leche ke ni endenyo a tokar. Lo miro, lo golyo ma no lo toko…
La mujer estava muy merikiyoza. No aviyamos reskapado a Pussy de la kaye para ke muryera de ambre en muestr kozina! Deviyamos de azer una koza lo mas presto possible ! Ma kualo ? Mos rompimos los meoyos i al bodre de la dezesperasyon mos vino la briyante idea ke klaro, Pussy era muy chika para komer. Deviyamos de mantenerla kon biberon.
Esto fue fasil, porke justo en este tiempo ya teniyamos un bebe en kaza: Muestro Segundo ijo Amir. Teniyamos en kaza a lo menos una dozena de biberones, todos sterilizados i y prontos para usar.
-“Loko salites?” disho la mujer – “darle a komer a un gato eskorchado kon el biberon de Amir! Va a la farmasiya i merka un biberon para Pussy!”
-“No, yo no me vo! “ Le dishe. “Puedes imajinarte un ombre adulto I respektavle komo mi, entrar en una farmasiya i dizir –me daj un biberon de bebe para un gatiko ? Pensariyan ke so totalmente pedrido!”
En el kamino a la farmasiya desidi de no dizir el verdadero buto del , i.. komo si de nada le dishe a nuestra amiga farmasyena “Kero un biberon por favor!”
-“Komo esta Amir?” me demando.
-“Mersi, ya peza mas de sinko kilos.”
-“Oh.. Muy bien . I ke tipo de biberon kere ?”
-“El mas barato..”
Un grande silensiyo kayo en la farmasiya. Los otros klientes se alesharon de mi kon desgusto.
Ke verguensa – me miraron – Un senyor tan buen vistido, kon antojos i un otomobil tan grande, merkando para su bebe el biberon el mas barato! Bah !..
Akeya amavle sonrisa en la kara de la farmasyena s’esparesyo.
-“Komo kerej… ma estos biberones se burakan muy presto”
-“No ay nada, lo apego !” le murmuri.
La farmasyena sakudio sus ombros i kito una grande varieta de biberones, empesando de las maraviyas espesyales fabrikadas en Gran Bretanya, asta una koza marron i miserable ke por siguro azeria gomitar a un bebe.
“Esta”, -le dishe mirando en basho- . “la marron.” En este momento, una senyora gordika ke estava a mi lado, intervino.
-“Mira, sinyor, ya se ke no es mi echo ma, su bebe es lo mas presyado ke tiene. Verdad ? Ekonomisa de otras kozas ma para tu ijo merka siempre lo mijor. T’esto avlando komo madre, Sinyor !”
Demandi los presyos.
Los grandes kostavan entre 35 i 62 liras, i el maron solo 7.
-“Los rompe todos, merkar los karos va ser echar paras a kaye”. Me murmuri de mi para mi
-“Porke ke los rompe” disho la farmasiena, “si lo tienes ansi, kon la kavesa bien apoyada en tu braso siedro, nunka lo puede romper.”
Me imajini a Pussy kon pamper apoyado en mi braso siedro. Oy ke orror!
- Es ke muestro bebe es un poko enerjetiko… da puntos de piye… Me das el marron por favor ?
-“Ah, penso ke no savej komo detenerlo” disho la madre godra “tenej una dada, una enfirmiera? Vos embiyare una muy buena… Un bebe hiper aktivo deve de ser mirado por un profesyonal. Aspera, la yamo agora mismo… Veremos si ya esta libre “
Aviya manko de tres metros entre yo i la puerta, ya keriya salir i fuyir de ayi. Pussi, ke vaya coriendo detras de los ratones. Maldicha ke seya !
-“Deves de agradeser a la senyora” me dize la farmasyena, “Eya tiene kuatro ijos i son las kreaturas las mas trankilas del mundo. Eya te va topar una enfirmera ke va kurar a Amir de sus malos uzos ”.
Teniya una chika esperansa ke la dada no estava libre, ma no fue…
-“Puede vinir a vervos amanyana ? A las onze, vos konviene? “
-“No” le dishe, “Estamos okupados.”
-“A la una?”
-“Tengo leson de eskrima”.
-“I tu mujer?”
-“Eya tambien”
-“Entonses a la una i media ?”
-“Estaremos durmiendo”.
-“A las kuatro? “
-“Dayinda durmiendo”
-“A las sej ?”
-“Tenemos vijitas.”
-“A las ocho?”
-“Mos vamos al muze”
-“Mira, de verla no te kosta nada, si es esto tu problema”.
Los otros klientes paresiyan prontos a aguarme kon sus manos. Sus miradas diziyan “El Dio no deve permeter ke montruos komo estos tengan kreaturas”.
La madre godra serro el telefon i me dio la espalda. La farmasyena me demando:
-“Alora el mas barato ?”
Le meneyi la kavesa sin pueder avlar una sola palavra.
-“Dio Santo, desha me salir bivo de aki, te juro ke va avrir un orfelinato para gatos. “ Me murmuri de mi para mi.
La farmasyena me echo una negra mirada i en un esforso finai : “Mira esta tetina de kautchuk, antes ke te rendas kuento, el burako se azera tan grand ke, -el Dio ke no mos de- el bebe se puede ahogar”
Ya no puediya mas suportar la dolor de mi kavesa. “No ay nada, tiendramos otro bebe …” le respondi.
Esto fue la damla d’alkavo en la kupa… Un senior de medio edad me se aserko, mostrando me el punyo en la kara i gritando :
-“ Oye, no se ke guerko sos tu ma ya saves para ken azen estos biberones baratos ? Para darles a komer a los gatos !”
Sinti ke me se aflosharon las piernas. Ay un limito para lo ke se puede suportar.
-“ D’acordo” le dishe a la farmasiena kon boz ronka, “dame el mijor”.
-“ Sesenta i dos liras”.
El biberon ke me dyo era el mijor de la marka ingleza i kon dos anyos de garansiya.
Torni a kaza. Mi mujer salyo loka de los inyervos kuando lo vido.
-“Ke tienes ? Ke tuvites de eskojer el biberon el mas karo de la farmasiya?”
-“Mujer” le respondi, “Ekonomiya azeremos en todo lo ke keres, ma no para los gatikos !”
Fani ENDER
Es ke meldatesh la eskrita de una semana antes?
Yorumlar