top of page

BENSIYON PINTO



(Teksto-Audio)

(Yazarı sesli dinlemek için tıklayınız)



Todos los serkanos ke mos konosen saven la amista ke egzistiya entre Bensiyon, el deskansado, i yo. Eramos komo ermanos,una amista ke duro kaji 70 anyos. No uvo okazyon emportante en muestras vidas ke no estuvimos en juntos. En muestra manseves siendo miembros de los mizmos serkolos de juventud resivimos la mizma formasyon i el mizmo ideal. Ser djudyo sionisto, i kerensyozo del djudaizmo. Anyos ovrimos mano kon mano por este ideal i devo dir ke Bensiyon fue un champiyon en este kampo.

La Komunidad Djudia de Turkiya nunka se devra olvidar de sus esforsos al seno de las otoridades turkas por protejarla del antisemitizmo. Diya no pasava, el siendo prezidente de la Komunidad durante munchos anyos, de no intervenír o okuparse seryozamente mizmo por kavzos chikos de akeyos ke le demandavan ayudo. Siempre ke uvo kavzos litijyozos entre miembros de la Komunidad el fue nomado arbitro. Me kontava, ke de vez en kuando, se pezentavan situasyones tanto embrolyadas ke era difisil topar un kompromiso entre las partidas, koza ke le kavzava ezveles. Bensiyon nunka acheto a resivir kualker pagamiento por sus esforsos sea al sena de la Komunidad sea en las relasyones kon las otoridades del governo turko. Nunka manko de onorar bodas, barmitzvas, funerales, fiestas de famiyas onde era envitado i se pode dizir ke uvo momentos ande Eti su mujer mos se keshava de ver su marido tanto kanso. Este modo era mi kerido amigo Bensiyon.


Grasias a esta amista, una vez kazados i patrones de famiya, muestras mujeres se izieron muncho maz serkanas de mozotros. No pasava semana ke no se viyan o ke las dos famiyas no se vijitavan. Anyos, en las enveranadas vinian a morar por 5 mezes en el foburgo de Yeshilkoy onde biviamos mozotros los Salti’s el anyo entero. Ansi la vida kaji mos pasava enjuntos. Entre los anyos 1975 i 2000 mi mujer Mimi i yo biviendo en Djenevra i en Nisa mos alegravamos de resivirlos i pasar vakansas enjuntos. Lo mizmo fue kuando vinimos a bivir en Israel. A Bensiyon i a Eti les gustava no solo de vijitar frekuentamente sus famiyas ma de estar kon mozotros para deskuivrir el payis. Estos eran momentos de relaksasyon para Bensiyon ma ke malgrado todo durante los kualos, mirikiyozo no se arestava de telefonar a Estambol para informarse de sus kolegos la situasyon en la kuala eran los echos de la Komunidad.


Durante sus anyos de enfirmidad siempre ke tuvimos la okazyon no mankimos de ir a verlo i difisil me era de guadrar mi sentimiento de tristeza de verlo en el estado en el kual se topava. Mizmo en su estado estasyonaryo via la klareza de sus ojos ke me asemejavan kerer dirme kualkoza.


Kerido amigo, konfidente i konsejero en mis oras de estrechura nunka mankates de ser atensyonado enverso de mi i de mi famiya. Mimi i yo en muestra vida nunka mos alvidaremos de ti, de tus consejos i de tu amista.


Bensiyon kerido durme en pas porke la ovra ke deshates en este mundo perdurera eternelmente.


Eti kerida, keridos Benjamen i Hayim, partajamos vuestra dolor de peryer un marido,un padre de valor, ke supo siempre estar atentivo i kerensyozo enverso de vozotros. Mimi i yo kedaremos sin duvda siempre serka de vozotros.

YEHI ZIKRO BARUH.


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page