UNA KONSEJA TRISTE

En Facebook meldi una konseja ke me plazyo muncho. La kije traduizar aki por los lektores.

Kuando era mansevo, en Shishane aviya un kafiko ke se yamava "Sarı Madam". La djente viniyan aya i djugavan kartas. Las famiyas viniyan, beviyan chay, komiyan simit i aziyan sohbet. Aviya una ermoza vista del Halich. El kafiko estava situado en la punta de kaleja de Şişhane a Hasköy. En el pasado, no era solo un lugar para djugar, era un entorno sosyal. Mos ivamos aya para bever sigaro sin ke muestros padres mos veygan.

Un diya, vino un ombre al kafiko. Estavamos asentados kon amigos en la meza de al lado, estavamos bevyendo chay. El ombre teniya una aparansya de esnafiko. Ya se estava entendyendo de la kara ke teniya un sikinti. Sus amigos tambien ya entendyeron esto. Uno dentre eyos le demando: "Oye, Shapat, tienes algun problema?". "No me demandes’’. Se asento en la primera siya vaziya ke topo. "Konta Shapat, puede ser ke te puedemos ayudar".

Shapat empeso a kontar. Komo estava asentado en la meza al lado de la muestra, estavamos oyendo sus palavras una por una. "Teniya kuatro kazas. Teniya paras en la banka. Tambien aviya unas kuantas djoyas de mi mujer, esta en ganeden. Yami a mis dos ijas i a mi yernos i les dishe: 'Vo divizar lo ke tengo entre vozotros. Yo kero bivir kon uno de vozotros. No kero bivir solo'. "Iva kedarme kon mis dos ijas, un anyo kon kada una. Mos dimos a entender ansina. Todo kamino bueno en el empesijo. Duspues, este trato se redujo a mezes, semanas i agora a diyas. Estan dizyendo ke no me keren en sus kaza porke el orden de kaza se esta bozdeyando. A lo ke entenditej, me vana meter a la puerta. ." Uno de sus amigos, İshak Efendi disho: "Esto es tu problema? No te mirikeyes, amanyana demanyana mos toparemos aki. Yo te va ayudar a rezolver tu problema".

Mos ambezimos mas tadre del proprietaryo del kafe, lo ke afito. Estavamos en mirikiya de lo ke afito a Shapat. Estos dos amigos se toparon al diya. İshak Efendi kito una yave de su aldikera i se la dyo a Shapat. Esta yave era la yave de la kasha de una banka i teniya un numero kon las letras "OB". "OB" era la abrevyamyento de Osmanlı Bankası. Esta banka teniya grande reputasyon akeyos diyas. "Mira, vaz a dizir ke pedrites esta yave en la kaza de tu ija chika. Aviyas dicho ke keriyas kedarte mas muncho tyempo kon tu ija chika. Aze atansyon, no te olvides ande echates la yave. Duspues vaz a empesar a gritar: ‘’Peryi la yave’’. A la fin, vaz a topar la yave. Tu ija te va demandar: ''De ande es esta yave?’’. Tu vaz a dizir: ‘’Es la yave de mi kasha en la banka. Te parisyo ke vos di todo lo ke tengo? Mis paras, mis bonos, estan en la kasha de la banka. Si me muero en tu kaza, tu vaz a tomar la yave. Si me muero en la kaza de tu ermana, esta yave va ser suya. Esto es el plan ke tengo en la kavesa’’.

Shapat izo todo lo ke disho İshak Efendi i segun lo ke oyimos despues, bivyo komo reyes en la kaza de su ija chika. Despues de su muerte, su ija i su yerno tomaron la yave i se fueron a la banka. El direktor de la banka les disho: "No tenemos un numero komo este ".

Shapat tambien desho una nota: "Solo ansina voz puediya azer benadam".

Apretar al boton para ver todos los eskritos