OY KOMO ESTABLESER UN MUEVO GOVERNO SIYONISTO
En las dalkavos eleksyones el partido Likud salyo el primer, malgrado esto la totalitad de la opozisyon aktuala demanda del Prezidente Herzog a ke eyos sean nomados para estableser el muevo governo. Los partidos arabos seguro ke teneran una grande influensa en el muevo governo si ve el diya. Independiente de la aritmetika de las sias de la Knesset un tal governo puedra tener aksyones preokupantes en adjuntandose kon los arabos.
De mi perspektiva personel digo ke es Israel ke peryo estas eleksyones, no porke la demokrasiya no le reushe, al kontraryo el espirito demokratiko es bastante bivo, ma eyas no solven los konfliktos internos egzistentes. Los sivdadinos israelís no les emporta ken formara la koalisyon, basta ke eya garantize a kada uno de eyos ke sus demandas serán achetadas i aplikadas. Si no, los ke se aravyan i ke no les gusta el governo planifikan de no bivir mas en Israel. Si no se kree una konfiensa entre el governo i los sivdadinos, el es kondanado en demokrasiya a ser trokado a traverso eleksyones antisipadas, koza ke es popular en Israel.
Se aspera en los diyas vinideros negosyasyones entre los partidos, entre eyos avera demandas, konsesyones i mizmo akuzasyones, promesas ke kon tiempo no se respektaran i mas. Los oponentes de ayer a la okazyon se azeran haveres de los partidos en pueder i vis versa los aliados viejos se toparan entre eyos en opozisyon en las mezas de negosyasyones. Se deve rekonoser ke la sosiedad israelíana mas de las leyes i institusyones nesesita aksyones kon propozito moral, koza ke falta.
Aktualmente, por enshemplo la situasyon en Evropa no esta mas mijor de la de Israel. Basta de ver los solevantamientos ke perduran en Fransia, la panika por razones de gerra de los sivdadinos britanikos ke azen rezervas de komanya i de agua a la demanda del governo inglez. A traverso la Evropa la inseguridad ekonomika, la polarizasyon politika i los rebolteares sosyales kavzan grandes danyos en las sosiedades demokratikas del kontinento. Ademas la gerra en Ukranya kontra la Rusia se asemeja a la sereza en la kavesera de la torta. Ajustaremos a esto la influensa del islam politiko ke kavza muncho dezorden en las komunidades evropeas, mos ambeza ke el mundo pena a sintirse en pas.
Oy en Israel visto las sirkonstansyas gravas a las kualas devemos topar repuestas devemos ser unidos i tolerantes sin mirar a derechos i interesos privados visto ke la sosiedad no puede sovrevivir este djenero de egoizmo. Devemos de demandarmos de mozos para mozos kualo es muestro ovligo enfrente la nasyon, komo azer para bivir en pas i mirar de defender la ideolojia siyonista ke muestros padres mos ambezaron. Asperimos 2000 anyos kon gezera, provedad i sin defensya para retornar a la medina, a muestra tyerra, 80 anyos ay ke la defendemos kon fuerza i determinasyon, será pekado achakes de un egoizmo politiko de divizar muestra nasyon. Grasyas a sus sivdadinos unidos i patriotikos Israel se izo un payiz sin igual en el mundo, demokratiko, fuerte i riko.
I ke djinero de enshemplo devemos dar a muestros ijos? Es ke les ambezaremos ke en demokrasiya ay solo los ke ganan las eleksyones i otros ke las peryen, ke los ke peryen son diskreditados i umiliados? Por seguro ke no, ser líder ez ser responsavle i no mirar a resivir rekompensas. La responsabilita publika es una oportunidad para servir i no simplemente para egzersar el poder en pensando a su futuro. El partido ke fue eskojido i ke forma el governo tiene la otoridad de governar ma no tiene el derecho de menospresyar los ke votaron kontra el. Los partidos ke forman la opozisyon igualmente tienen responsabilitas enverso los elektores i la ovligasyon es de kontrolar el egzekutivo i si menester es de opozarse a sus dechizyones.
Seremos optimistos, kon el ayudo del prezidente Herzog esperamos ke los partidos del sentro sin los ekstremistos de la siedra komo los de la derecha i sin los arabos seran kapaches de estableser un governo por los anyos vinideros en mirando de defender de todas las maneras Israel, sovre todo en estos momentos de grandes difikultades.
Dr.Selim Salti
Es ke meldatesh la eskrita de una semana antes?
Yorumlar