EN ISRAEL EL UMBRAL (BARAJ) ELEKTORAL DESFORMA LA DEMOKRASIA
La baryera de 3.25 % devia krear la stabilita en las eleksyones, al kontraryo eya kavzara una desformasyon en las vinideras.
Vino el tiempo ke Israel devra revizar el umbral elektoral establesido en el anyo 2014 porke no responde mas a la realidad politika del payiz. En el impesijo el umbral era de 1% despues ke pujo a 2 % i enfin en 2014 a 3,25% afin a ke los partidos politikos minoritaryos ke no depansan este porsentaje sean eliminados de vista, lo ke dara la posibilita al partido ke gana la majoria de poder konstituir una koalisyon afin de tener la majoridad de 61 asyentos en la Keneset de120. Ansi se penso ke la governansa del payiz será konsolidada i ke la fragmentasyon sera amenguada.
Bien entendido la politika de akel tiempo djugo un rolo importante en esta dechizyon kon la kuala se miro a ke los partidos chikos arabos no sean reprezentados. El resultado fue un poko komik i kontraproduktivo visto ke los partidos politikos arabos se adjuntaron en una lista kondjunta i dyeron una importante performansa en ganando 13 asyentos.
En el anyo 2022 las eleksyones mos demonstraron un eksperimento de no olvidar. El viejo primer ministro Yair Lapid del partido Avoda rogo a la prezidente del partido Meretz, Merav Michaeli de adjuntarsen i de prezentar una sola lista. Koza ke fue refuzada por la sinyora, ke ensistyendo ke su partido ganara muncho mas asyentos en la eleksyones. Al final se vido ke esta dechizyon fue un grande yerro en la istorya aktuala de Israel. El partido Meretz resivyendo solo 3.16 % de los votos i fue eliminado de su prezensya istorika en la Keneset. Si los 2 partidos se adjuntavan ivan a tener 6 % de los votos en ganando 7 asyentos. El partido Balat prezentandose independientemente de la lista Araba no resivyo ke 2.9 % de los votos i ansi fue eliminado. Ademas todos los votos ke fueron dados a los partidos ke no depasan el umbral son peryidos, situasyon ke defavoriza los grandes partidos.
Durante anyos los grandes partidos ke fueron eskojidos por el puevlo israeliano sovre el sistema elektoral egzistente, malgrado el umbral de 3.25 % no fueron kapaches de evitar a ke un chiko nombre de deputados de chikos partidos los ovligen a achetar sus kondisyones para permeter la formasyon de un governo, lo ke prova ke este porsentaje no fonksyona komo se deve.
El governo Bennett-Lapid durante el poko tiempo ke governo mos amostro a ke punto el fue flako. Kon la demisyon de Idit Silman la mayoriya de 61 deputados kayo a 60 i ansi governar fue problematiko. Mas despues el kavzo de Ghaida Rinawie Zoabi ke dechido de demisyonar i ke ansi el governo estava para kayer, fue patetiko, visto ke konverserla a renunsiar a su demisyon nesesito una presyon jeneral bastante fuerte. Ansi vemos ke kon la demisyon de un solo deputado un governo puede sin falta kayer, koza ke es presizamente el fenomeno ke el umbral es supozado amelyorar. De otra parte en kada eleksyon se dezvelopa el fenomeno ke miles de sivdadinos tenyendo un voto valido resiven zero reprezentasyon parlamenterya, problem ke se devra estudiar kon atansyon en kavzo de una reforma elektoral.
Kon razon Israel devra rekonsiderar enteramente el dizenyo del sistema de votasyon. Una opsyon, será sovre las ideas de siertos politikos de abashar el umbral konsiderablamente a un nivel muy basho dando ansi la shans a una mas grande proporsyonalita a kada partido politiko chiko o grande. Una segunda opsyon propoza el kontraryo de la primera, pujando el umbral a 5 %. En esta manera una baryera se formara sovre los partidos politikos dando insentivas irrezistivles para konsolidar sus situasyones antes el día de las eleksyones. Ademas dando al partido de la majoransa la posibilita de no toparse en situasyon de djignishear kon minoritarios pokos elidos.
Enfin vino el tiempo de pujar el nombre de deputados de 120 a un nombre mas alto ke reprezentara mijor el puevlo de Israel ke oy depasa los 10 milyones de sivdadinos. Fue dechidido en 1948 por los padres fundadores de Israel el nombre de 120 deputados kuando el Yishuv tenia a penas 600000 djudyos i este shifro fue bastante por una peryoda larga, ma no mas para oy en dia i ni en el futuro de la nasyon Israeliana ke pujara en kantita mas i mas.
Dr.Selim Salti
Es ke meldatesh la eskrita de una semana antes?
Yorumlar