LAS PERIPESIAS KE SE PUEDEN VER EN EL FUTURO EN ISRAEL
Kale azer muncha atansyon a las dechizyones de los Evropeos enkavesados por los Britanikos sovre las restriksyones ke impozaran a los produktos vinyendo de Yehuda i Shomron. En realita en Israel se pensa ke si se aplikan estas restriksyones eyas no kavzaran muncho danyo al komersyo kon los payizes evropeos ke en totalitad son de 43.3 bilyones de euros donde 33.196 bilyones de importasyon kontra 29.4 bilyones de eksportasyon. No ay duvda ke si las restriksones ke dainda no se save kuando se ampesaran a aplikarsen, eyas traeran kon el tiempo un prejuisyo al komersYo israeliano i en mas chika intensidad a los payizes evropeos. Egziste la posibilita a ke la ekonomiya israeliana troke fondamentalmente.
El problem de Israel en esta situasyon sera ke los grandes grupos de industriya evropeos komo los grupos evropeyos interesados en los produktos israelianos, en los sistemas de teknolojiya i mas se pueden arrestar de investir en Israel del espanto ke en dezvelopando la ekonomiya israeliana eyos seran indirektamente akuzados de ayudar a la povlasyon de Yehuda i Shomron. De mezmo las kompaniyas internasyonalas se pueden demandar si eyas deven de kontinuar a tener operasyones en Israel sin ser akuzadas un diya de kolaborasyon kon un rejim de opresyon. Si esto sera el kavzo munchas de las sosyedades israelianas seran ovligadas de mudarsen en el estranjero ansi los investimientos se amenguaran a bastansa.
El buto de los dirijentes inglezes, kanadyanos, fransezes, espanyoles i ollandezos i mas es de mirar a ke Israel no se apatrone en partida o en totalidad de la zona en konflikto despues de las eleksyones del 27 Oktobre. Mizmo la vaye del Yordan onde ay establesimientos israelianos , este frandja de tyerra ke mizmo los opozantes de Israel la akseptan komo tyerra israeliana sera problematiko.
Mizmo ke los Estados Unidos, el prezidente Trump kedan leshos de akuzar Israel de akaparar tyerras ke no le apartiene, no se save kon el tiempo si esta situasyon kontinuara, visto ke en pokos anyos una mueva administrasyon puedera trokar de dechizyon. En esta situasyon kualo devra Israel azer para defenderse. En primero el devra diversifikar su politika ekonomika i diplomatika en dezvelopando muevos merkados espesialmente en Asya i partikularamente kon estados onde la situasyon de Gaza i de los palestinianos no kavza obstakolos a dezvelopar interkambyos komersiales. Israel es un payiz inovativo i ansi puedera kon pasensya topar sosyos ekonomikos muevos.
Israel puede ser mas izolado, la vida en el payiz mas kara i menos atraktiva a los investimientos i peryer en partida el kontakto aktual kon la ekonomiya i la diplomasiya oksidentala onde el peno anyos a ser achetado komo miembro. Ma Israel kual ke sea lo ke pensan los dirijentes evropeos el nunka devra achetar a ke los governos etranjeros dikten sus kondisyones a sus dechizyones i la manera de tomarlas.
Ay kavzos ke Israel pagara el presyo karo sovre siertas de sus dechizyones kuando se trata de su seguridad. Ademas el puevlo israeliano devra arrestar el komporto de refuzar los avertisimyentos. Los politikos israelianos repetan todo tiempo ke la Evropa no es tanto importante, ke las deklarasyones i las kondanasyones de las Nasiones Unidas son sin importansa i ke es peryita de tiempo de kombatirlas i ke finalmente la Korte Internasyonala de Krimes no es relevante. Munchas de las dechizyones i de las deklarasyones de estas institusyones no son djustas, ma malgrado esto Benjamen Netanyahu i munchos mas otros no pueden viajar a la Evropa achakes de eyas.
Ademas la diplomasiya publika de Israel fue neglidjada durante las dalkavas gerras por la simple razon ke Netanyahu manko a su dover de nomar un responsavle. Las konsekuensas fueron ke kada ministeryo izo sus deklarasyones sin ke ayga una santralizasyon i sin tomar en konsiderasyon los efektos sovre la diplomasiya. Finalmente despues de anyos de ser akuzados Israel i Tsahal, los militares tomaron la dechizyon de estableser un ekipo multidisiplinario para responder a las nuvelas falsas i a las distorsyones sovre la kondukta de la armada durante las gerras kontra los palestinianos en Gaza i las del Hezbullah en Libano i esto despues ke el filmo mintirozo fue ovasyonado en Venezia.
Ma los diskorsos no son stratejiyas, Israel se topa enfrente de una kampanya kontra la kuala se devra defenderse en diferentes frontes, en los kampos de gerra, en las institusyones internasyonalas, en la arena de la informasyon i agora en el kampo de la ekonomiya i de la presyon finansiara. Es ke Israel seryozamente se kreye estar pronto sovre lo ke lo aspera? Israel bivera no ay duvda ma sera diferente.
Dr.Selim Salti
Es ke meldatesh la eskrita de una semana antes?
Yorumlar