OY SER DJUDYO EN ISRAEL
- 37 dakika önce
- 3 dakikada okunur
Poko mezes despues Israel va tener eleksyones parlamentaryas onde se determinara el governo futuro ansi el djenero de politika sosyala ke kereremos tener. Durante los debates pasyonantes aktuelos al sujeto de los haredi ke refuzan de azer askerlik, komo rejir los fondos publikos, komo amelyorar los servisyos relijiozos, investigasyon sovre el 7 Octobre, komo definir la identita israeliana, el medyo politiko, la prensa, los lideres de los partidos de la derecha komo los de la siedra no dan importansa a la kestryon la mas delikada ke es de estableser ken va ser el patron del djudaizmo.
En Israel una ekuasyon danjoroza empesa a dar rayises a este sujeto a saver: El djudaizmo esta asimilado a la relijiozita, la relijiozita a la ortodoksiya, la ortodoksiya al establesimiento rabiniko i a los partidos politikos haredi. Los sivdadinos ke son relijiozos i ke guadran los preseptos relijiozos konsideran ke eyos son los ke reprezentan el djudaizmo al nombre del publiko israeliano i por esta razon tienen derechos a tener un statuto espesial. No azer askerlik, el kual es la baza sivika obligatorya de kada sivdadino israelí ke deve kumplirla sin falta. Ademas reklamar del governo fondos de dinero importantes para los sivdadinos relijiyozos ke no lavoran lo ke reprezenta una karga pezante al budjeto del estado.
Durante los dalkavos konfliktos militares el payiz nesesito kon urjensya inkorporar los haredim a la fuersas militaras (IDF) o a lo menos azerlos parte de la sosyeta de proteksyon de la uma. No ay duvda ke esto es importante para la sovreguardya de la identita djudiya del estado. Los haredis ke pretenden ser los guardyanos eskluzivos del djudaizmo devran entender ke a traverso sus establesimientos de servisyos relijiozos son responsavles del karakter djudyo del estado. La kasherut, los matrimonios, los divorsyos, la nominasyon de los rabinos i de los granrabinos todo esto dezde munchos anyos se izyeron sentros de fuerza politika, los kualos no solo son falsos ma susitan un renonsyo del djudaizmo. En mizmo tiempo un djudaizmo israelí tradisyonalisto, popular i komunitaryo enflorense en paralel a los sivdadinos relijyozos la kuala kon sus kustumbres es influente en muzika, en literatura, en teknolojiya, en komerso i bive sovre su stilo de vida israelí. Esta povlasyon ke reprezenta la mayoriya de los sivdadinos del payiz se ve ajena a los haredim.
En 2026 ken puede dechizar aken apartiene el djudaizmo visto ke no es mas una kestyon filozofika o teolojika ma un fakto dechizivo si los djudyos israelis keren bivir en juntos en Eretz Israel ke nesesita de ser defendido de parte de todos sus abitantes. Israel no abandono el djudaizmo ma solo los ke reklaman ser patrones de el. Se deve tomar un ‘break’, kortar esta nosyon para ke dingunos no vengan dizir ke eyos son los patrones del djudaizmo. Se pensa ke esta kestyon va ser uno de los desfios prinsipales del muevo governo el kual devra dechizar de alevantar el taboo de los partidos relijyozos ke se apatronan el djudaizmo.
No es djusto ke un sektor de la povlasyon se apatrone en eksklusivita la proprieta del djudaizmo a traverso los partidos politikos o los rabinatos, el apartiene a todos los israelianos. Vino el tiempo ke el muevo governo se okupe seryozamente de anular los monopoles en los servisyos relijyozos en kreando una kompetisyon por los del kasherut en dando derechos a los rabbis Tzohar de pueder operar komo otoridad ofisyal. Reorganizar los rabinatos i los konsilyos relijyozos en eskabuyendolos del kontrol politiko para ke seygan verdaderas institusyones al servisyo del puevlo. Vino el momento de dar muncho mas otoridad a las komunidades lokalas, un mas grande rolo a las mujeres i un grande pueder a los sivdadinos de eskojer sus reprezentantes.
Todo esto deve ser bien koordinado en un payiz komo Israel ke oy es divizado en identidades, en tribas en el kual ay el problem de integrasyon de los haredis a la vida normal israeliana, ke no es mas una kestyon de relijyon o de estado, ma una kestyon de muestro futuro.
Dr.Selim Salti
Es ke meldatesh la eskrita de una semana antes?
Yorumlar