LA AGONIYA DEL SEFARADIZMO
- 7 dakika önce
- 4 dakikada okunur
Despues de la ekspulsyon de 1496 de los djudyos del Portugal ampesa la sigunda diaspora, el grande egzilo. Los djudyos ke refuzaron la konversyon i guadrar sus relijyon tuvieron muncha difikulta a establisirsen en los payizes del Mediteraneo, en Ingletyerra, en la Olanda, en la Evropa del norte, en las diversas Amerikas i por lo mas en el Imperio Otomano. Kon grande amergura se alesharon de las patriyas iberikas onde bivieron miles de anyos. En seguida en los siglos 16 i 17 konversos ke avian kedados sekretamente djudyos se ajuntaron a eyos. Los djudyos resivieron asilo en los payizes onde fueron protejados ma kon derechos inferyores sovre los otoktonos.
En la esfera muzulmana se toparon sovre las kondisyones de dhimmilitud, ma malgrado esto en el Imperio Otomano fueron resividos por los governadores turkos kon antusiazmo onde se les akordo la liberta relijyoza i una grande otonomia. Ansi Salonik se izo una sivdad djudiya onde se praktiko komo lingua kaji ofisyal el ladino durante un poko mas de 5 siglos. La rika kultura mantenida del grego, del latino, del arabo i del ebreo, ke fue akeya de antes del egzilo kontinuo a sovrebivir i a dezveloparse. De otro lado los kabalistos ke vinieron de Espanya se establesieron en grupos en Sfad (sivdad en Galile) i regalaron la splendor de una kosmonogonia mistika i rasyonala.
En Evropa onde miles de konversos vinieron a establesirsen i retornar al djudaizmo renkontraron djudyos ke los resivieron kon tolerensya komo en el Grande Dukado de Toskana. Verso la fin del 18 siglo munchos de djudyos i konversos se establesieron en Los Estados Unidos payiz donde en sus aktos de governansa rekonosen la libertad de konsensya. El post-maranizmo dyo la posibilata a ke todas las komunidades djudiyas krean entre eyas un sistem de negosyo ke les permetyo de dezveloparsen en guadrando sus identidades a la eksepsyon del sabetaizmo onde una partida de los djudyos yamados ‘donme’ se mesklaron kon los otoktonos muzulmanos del payiz los kualos mas despues fueron los manadores del movimiento ke Ataturk kreyo la republika Turka.
En el siglo 20 ampesa la agoniya del sefaradizmo. En el mundo kristyano los konversos se diriten en las sosiedades otoktonas laikas. En Alemanya i Los Estados Unidos los sefaradim se asimilan kon los ashkenazim onde el patrimonio sefaradí se dirite. Kon la emigrasyon en partida de los djudyos Otomanos i Turkos verso la Evropa oksidentala i las Amerikas, de Salonik, de Estambol, de Izmir, del Cairo los kualos se laiksizan fasilmente permetyo a sus desendientes de azer kazamientos mesklados diritiendo lo ke les avia kedado de la kultura sefaradí a la eksepsyon del gizado de las madres.
Desde el empesijo del siglo 20 el sionizmo motivo a munchos sefaradim de establesirsen en la Palestina. Este koryente se va dezvelopar mas despues de la Sigunda Gerra Mondiala onde el rekuerdo atroz del nazizmo i el espanto ke kreyo el komunizmo metyo en muvimiento los sefaradím ke sovrebivieron de Gresya, de Bulgariya i de Romaniya verso la mueva nasyon israeliana. Los djudyos turkanos malgrado ke no sufrieron de la gerra, viendo el antisemitizmo en la republika izyeron sus aliya en grande kuantidad onde se asimilaron kon los israelis, peryendo ansi en partida sus sefaradizmo. Malgrado ke establesieron maales en Tel Aviv, en Batyam, en Ashdod i mas el sefaradizmo se dirityo kon el tiempo.
No solo ke el sefaradizmo se dirityo en la primera partida del siglo 20, el nazizmo ekstermino kaji la totalidad de los sefaradim de los Balkanes no deshando ke muy pokos bivos en 1945. En todas las partes de la Evropa onde el nazizmo paso ekstermino los sefaradím ke poko nombrozos bivian en forma de chikas komunidades. Se puede dizir ke los sefaradim durante el siglo 20 afrontaron 3 muvimientos ke provokaron inevitablamente la agoniya. Las primeras 2 i la mas importantes fueron la asimilasyon en el mundo laik oksidental i el israelizmo ke reabsorbyo los sefaradím al djudaizmo otantiko. La tresera la matansina de miles de sefaradim por los nazistos.
El derecho de los desendientes sefaradim de retornar a Espanya renokonosido por el governo Espanyol en 1924 aparese komo simboliko i ridikulo. Pokas famiyas sefaradím tornaron a las tyerras de sus antepasados lugar ke fue durante milanyos la morada del djudaizmo espanyol. Ademas en muestro tiempo se ve una chika imigrasyon de Turkiya verso la Espanya, ma mizmo este muvimiento keda muy flako.
En el anyo 1992 se komemoro los 500 anyos del espulso de los sefaradim, anyo durante el kual se demonstro el riko patrimonyo kultural i sivilizado abastanza diverso ke deve ser mantenido en la memorya djudiya aktual, en mirando de dezvelopar estudyos akademikos en las universidades prinsipalmente en Israel i a traverso del mundo en el kual eyos bivieron.
La lingua djudeyo-espanyola, el ladino es i devra ser el objektivo de estudyos universitaryos onde devran dezvelopar investigasyones eruditas i relijyozas para ke eya no solo keda biva en las kuzinas o en los salones de las kazas sefaradím. El sefaradizmo a medyo muerto kontinuara lo esperamos en las memoryas de los desendientes ke dainda se akodran de sus paryentes i des sus nonas i nonos. La saviduriya guadrara el pasado i el amor de los desendientes renderan su prezensya en muestros diyas. Es ansi ke a traverso la fundasyon Salti fue kreado el Instituto Salti para los estudyos del ladino en la Univesidad Bar Ilan en Israel, el kual es uniko en el mundo ke mira de formar djente ke investigan la lingua, la istorya, la muzika, la antropolojia i la saviduria sefaradita.
Dr.Selim Salti
Es ke meldatesh la eskrita de una semana antes?
Yorumlar