LA DEKADENSYA DEL SEFARADI EN ORIENTE
- 21 saat önce
- 3 dakikada okunur
De 1593 asta 1669 fue la peryoda la mas triste de los sefaradís ke vinieron a establisirse en el Imperyo Otomano. Eyos lechos de las reformas i de los muevos koryentes politikos, kulturales i artistikos ke el Renasimiento kreyo en el mundo evropeo no se adelantaron durante esta perioda en sus saverisyos i sus kreativitades ke avian trayido de la Espanya, de la Italya i de mas lugares del Mediteraneo. El obskurantizmo i el atrazamyento en la sosiedad sefardí fueron prinsipalmente el resultado de la deskayensa del Imperio Otomano en el kual ampeso a peryer su dezvelopamiento kreativo.
De una parte las gerras del Imperio kontra el mundo kristyano i de la otra el dezorden interno kreado por las tribUs ke se sozlevantavan kada nada aflakando el poder del reynado influenso a ke las minoridades peryan sus relasyones kon la Evropa. Mizmo el komersyo kon la Evropa dezvelopado por los djudyos peryo de su grandezA el kual sovre las Kapitulasyones dadas a los Fransezes, Austriakos i Italyanos servyeron por lo mas a levantenes kristyanos ke se establesieron en mayoriya en Salonika, Izmir i Estambol. Estos biviendo en forma de koloniyas serradas no se mesklavan kon el puevlo otoktono ke menospresyavan. Es ansi ke los djudyos ke avian peryido sus relasyones kon los merkadores evropeyos se izyeron para sovrebivir mosos de estos levantenes por los kualos servían a ser los intermediaryos kon el puevlo muzulmano otoktono. Es ansi ke fueron yamados en la lingua vulgar ‘los maranos’.
Una mayoriya de los djudyos ke se emprovesyeron achakes de la kayida ekonomika del payiz eran por lo mas artizanos ke se mantenían, kuando avia pas, sin muncha difikulta. Ma malgrado todo, en las eskritas de akel tiempo se melda munchas keshas sovre sus vidas difisil i eskayidas i sus sufriensas durante las gerras, los insendyos i las epidemiyas i hazinuras mortalas. Ma dezde kuando los ijos de Adam se kedaron de kesharsen? Sin falta se ve lo ke fue para eyos los diyas vyejos orozos en Espanya i los aktuales tristes en el Oriente.
La industrializasyon aparese al medyo del siglo i munchos de los djudyos ansi se enrikesen i se pasan bueno en sus vidas. Se ve en mizmo tiempo un mistisizmo i un entereso grande sovre la erudiksyon librera ke krea un sonyo ke emborracho mizmo los umildes miembros de la sosieta. Ma a mezura ke Venezia eskaye i ke el Imperio Otomano se dezaze i ke los maranos rikos i kultivados evitan de vinir a establesirse en las tyerras del Oriente, en las sivdades tal Estambol, Salonika i Izmir se amuenga la prezensya djudia. Ansi las komunidades djudiyas se emprovesen en almas visto ke se les avre el kamino de un muevo egzilo. Los ke kedan se enserran entre eyos en peryendo kada diya ke pasa de sus aktivitades ekonomikas i espiritualas.
El djudaizmo otomano perye kon el tiempo sus valores ekonomikas, se aze mas prove i en supito aparese un mesianizmo ke reboltonea el pensamiento i la konsensya de la sosiedad. Se dezvelopa ansi un durmidero medievalisto ke lo ovliga a alesharse del pensamiento koriente moderno oksidentalo. Alora no se ve mas personas savias ma ke eruditos i kabalistos ke enserran el puevlo en sus tradisyones i ke miran a guadrarlo de todo modo de idea progresista.
EL sabeteizmo deshara la kolektividad djudiya sarsaneada i palpitante. Los anyos i las jenerasyones pasaran ma los efektos dezastrozos, fatalistos de esta idea mesianika no despareseran nunka. De una parte amenguándose el trafiko de muevas ideas progresistas viniendo del estranjero i de la otra parte la pujita del obskurantizmo pezante en los meoyos de los miembros de la sosyedad djudiya kavzaron a ke la uzansa de la inisyativa kolektiva se atrofie. En muestra epoka es triste de renderse kuento komo los antepasados sefaradís kedaron a las bavas de los impostores i de los lokos. Las fantasmagorías i las modas pasajeras inkulkaron los meoyos de los sefaradís orientales, lo ke deskorajo los miembros los mas aktivos i savidos de las komunidades de no interesarsen al progreso sosyal de eyas.
Penso ke el avenimiento de Sabetay Sevi fue una parantez istorika del djudaizmo otomano, el kual paso de la edad de oro a una peryoda de deskaimyento i de eskuresimyento.
Selim Salti
Es ke meldatesh la eskrita de una semana antes?
Yorumlar