LA IPOKRIZIYA UMANA
- Dr.Selim SALTİ
- 3 saat önce
- 3 dakikada okunur
En estos dalkavos tiempos no ay diya ke en las medyas sosyalas no se renkontra una remarka, una kritika kontra la kayades de los grandes ‘tenores’ de la politika mundiala sovre el dezastro iranyano, onde miles de djentes gritan por las kayes para demandar libertad i mirar de eskabuyirse de los fanatikos muzulmanos shiitos, los ayatollahes, los kualos dirijan dezde 47 anyos este puevlo maraviyozo kon una mano de fierro. Ande están los ke akuzaron a Israel sin razon de kometer un masakro en Gazza. Ande están los antesemitos de Hollywood , ande esta Greta, los politikos de la uniones politikas de la siedra i los ekstremistos de la derecha del oksidente?
Deke no se solevantan kontra la krueldad del poder shiito en Iran ke sin piadad mata miles de sus sivdadinos? Los mizmos ke sin verguensa atakaron en manifestando en las kayes de Newyork, Londra, Paris, Estanbol i mas, kontra Israel ke tuvo el solo pekado de defenderse kontra el Hamas, onde su buto era de eksterminar el puevlo djudyo. Kayades i amudisyon les kayo porke el Iran armo kontra Israel el Hamas, el Hezbollah i Los Yemenitos Hutis. No sera djusto de kritikarlo porke si eyos diran mal de los ayatollahes kayeran en una pozisyon ekivokada ke los ovligara a demandar pardon de Israel. Koza imposivle.
Dingunos de los prensipales miembros del Konsilyo de las UN, no demandaron a reunirsen kon urjensa para diskutir del masakro del puevlo iranyano, deke el sekretaryo jeneral Antonio Guterres antisemito notaryo ke por el mas chiko achakito lo reunisa kuando se trata de kondanar Israel, keda kayado? Esto todo prueva la ipokriziya de los dirijentes del mundo en el kual bivimos. No ay de kreer ke solo en su nasyon i mirar por todos los remedyos a guadrarla de la inimista ke la menasa.
Los djudyos, Bendicho el Todo Poderozo, es un puevlo eterno de la umanita, ke siempre miro a sobrebivir malgrado ke durante siglos otros puevlos miraron de sekarlo de sus raizes. Ni los imperyos de la istorya ni los payizes ke kometyeron jenosidios, ni la Shoa no abastesyeron a ke los djudyos desparezkan. Oy el djudyo torno a su tyerra prometida, kreo el muevo Israel el kual es fuerte, bien armado, ekonomikamente uno de los mijores estados del mundo. A la ora de oy los djudyos de Israel son kapaches de venser sin falta sus inimigos, malgrado ke son poko nombrozos i sujeto a una inimista bazada sovre mintiras i selo. Israel fue kapache en 2 anyos de gerra a venser los 3 prinsipales proksis del Iran, el Hamas, el Hezbollah i los Hutis del Yemen, inimigos islamistos ke kedaron oy en una situsyon de disparisyon.
El Iran kontinuara si los ayattolahes kedaran en poder a ser el prinsipal inimigo de Israel i a esto se topara remedyo solo si el puevlo iranyano ke en prensipyo es amigo del puevlo djudyo, será kapache de eskabuyirse del rejimen aktual. El prezidente Trump i el primer ministro Netanyahu devran de mirar de ayudar al puevlo iraniano en uzando todo modo de oportunidades ke son disponivles a la ora aktual. Se espera ke los payizes evropeos malgrado sus konfliktos kon Los Estados Unidos achakes del Greenland, ayudaran a ke este eshuenyo iranyano se aga realidad.
Visto esta ipokriziya, los djudyos devran tomar leson de lo ke se esta pasando oy en el oksidente onde la mayoriya de su diaspora se topa. Una grande kantidad de los djudyos ke dainda no suvyeron a Israel, ke no izyeron sus aliya i los israelianos ekpatriyados visto el aktual antisemitizmo pujado, si no todos, una grande partida de eyos, devran pensar a vinir o a retornar a Israel. Diremos ke la aliyah no es una manera de salvarse ma una aksyon importante de trokamiento de vida. No será fasil ma la eksperyensa lo prova no es tanto difisil. La aliyah kere dizir bivir la istorya djudiya en Israel, no komo sentida en el etranjero. Israel es el solo lugar onde el djudyo no demanda permisyon de poder defenderse. Ser su propio governador i ansi komo dechizar de su futuro. La aliyah es el sembol de la liberta, ser miembro de su payiz onde su boz se siente, en kurto la kontinuasyon de la vida istorika djudiya.
Este es un momento de oportunidades no de desgustos ke se deven valorizar kon konfiensya porke talos momentos ke son ralos mos ambezan la istorya djudiya.
Por el Dr. Selim Salti
Es ke meldatesh la eskrita de una semana antes?
Yorumlar