LA RAZON POR LA KUALA AKONTESYO EL 7 OKTOBRE
- 6 saat önce
- 3 dakikada okunur
En estos diyas de gerra kontra el Iran i su proksi Hezbollah ke no se save kuando se eskapara i kualos serán sus rezultados, el mundo politiko mundial en las platformas del internet, en los programes de miles de televizyones, no se kansa de formular las alternativas futuras para el Medyo Oriente i el rolo ke Israel tenera en esta parte del mundo.
De mi punta de vista dire ke los estados ke forman el Medyo Oriente por seguro se toparan en un muevo diferente atmosfero dirijado por la CIA amerikana en el kual los payizes arabos ke lo keraran o no serán en pozisyon de rekonoser la supremasiya de Israel. Ma kualo será de la inimista kontra el djudyo en el mundo arabo i muzulmano; esta kestyon será fondamentala ke devra ser analizada.
Eske el slogan ‘muerte a Israel el satan’, ‘muerte a los djudyos’ desparesera o trokara de aspekto?
Basta de analizar lo ke kontensyo en el 7 Oktobre 2023 i estudyar los faktores ke enkorajo los inimigos de Israel de Gaza a atakar el sud de Israel.
Este atako mostra la similitud entre el progrom del 7 Oktobre i el ineksplikavle orror inflijado al puevlo djudyo a traverso los siglos.
Ni Israel ni el mundo oksidental amigo de el se pensaron ke una tala barbariya era posivle, akto ke los desho perplekso en frente de la matansina ke tuvo lugar.
Dezde de su kreasayon Israel nunka fue ovligado a konfroktar un tal atako en su territoryo.
Los arabos palestinianos se organizaron durante anyos a observar kualas son las flakezas de los israelianos para pueder atakarlos.
Eyos viendo ke los israelianos se están peleyando entre eyos los lideres del Hamas se enkorajaron a atakar Israel el 7 Oktobre en un tiempo onde la vulnerabilita de la situasyon en Israel era grave.
Las raizes del atako es el fruto de un aborresimiento del djudyo en las eskolas arabas, en los kampos de vakansas, en las mishkitas i en los programas de radyos i televizyones.
Despues de los akordos de Oslo, la autoridad palestiniana ke fue kreada, Yasser Arafat i sus dishiplos kontrolaron de serka el ensenyamento de la manseves araba.
Durante 33 anyos pasados eyos fueron edukados a aborreser los djudyos, adorar el terrorizmo i de dedikarsen komo buto final a la destruksyon de Israel.
Es ansi ke en el 7 de Oktobre los arabos metieron en pratika lo ke les fue ensenyado.
Ansi se ve la semejansa entre la violensa de la Edad Medya i del atako del 7 Oktobre malgrado ke las situasyones no fueron igualas.
Difisil de dar a entender komo la frontiera entre Gaza i Israel estava tanto mal kontrolada por Tsahal i de ver por la primera vez una tala armada araba atakar Israel sin ke la intelijesya israeliana se renda kuento.
La konfiensa del puevlo israelí enverso su governo fue una grande desiluzyon, koza ke kavzo una deskontentes el diya de las eleksyones.
Las inovasyones teknolojikas revolusyonaron la komunikasyon moderna, por bien komo por mal i se ve ansi la pujita del antisemtizmo a traverso la medya sosiala.
Despues del 7 Oktobre eya fue empleada komo arma para mostrar el djenero de krualdad ke fue echa por los palestinianos, koza ke mostro su dimensión al mundo entero.
Esta mueva teknolojiya se puede ver komo positiva en kavzo ke el umano ke la empleya es onesto i no mostra inimista a otro umano.
Ma los palestinianos la empleyaron para mostrar sus krueldades en paradando unas de las partes de los puerpos de sus viktimas.
Se deva achetar kel antisemitizmo de una manera o otra va kontinuar a egzistir.
Ma despues del akto del 7 Oktobre sea los israelianos sea los djudyos de la diaspora devran organizarsen para kombatirla i de mirar a ke aga lo mas poko de danyo posivle.
Para esto kale ke konvenskan el mundo oksidental komo el mundo arabo a arankar las raizes del antisemitizmo en la edukasyon de sus muevas jenerasyones.
El model de la denazifikasyon despues de la Segunda Gerra Mondiala i su resultado es el mijor eshemplo ke la umanidad tyene.
La autoridad palestiniana dezde 33 anyos de los akordos de Oslo tuvo la posibilita de frenar la edukasyon antisemita i inimiga de Israel, ma no la izo, dunke una otra autoridad ke se formara devra okuparse si un diya los arabos kereran bivir en pas.
Komo Hillary Clinton avia dicho en una de sus vijitas a Israel la edukasyon de los mansevos palestinianos es ‘un sistem de abuzo ke kale despareserlo’.
Selim Salti
Es ke meldatesh la eskrita de una semana antes?
Yorumlar