LA ENKAPACHE DIPLOMASIYA ISRAELIANA
- Dr.Selim SALTİ
- 7 saat önce
- 3 dakikada okunur
Israel fue kapache de ganar las gerras kontra los proksis del Iran i mostrar ansi al mundo ke es un payiz militarmente, teknolojikamente, ekonomikamente i en entelijensya un líder en la rejyon onde se topa ma ke fue enkapache de ganar la lucha en el kampo de la diplomasiya publika.
Su indeskutivle kapachita en el kampo militar, en la intelijensya artifisiala i sibernetika, en la kreativita siantifika i su impresionante performansa ekonomika lo plasa entre las nasyones las mas avansadas del mundo.
Malgrado estos faktores de fuerza el fue indikapado en la arena de la diplomasiya publika mostrando una flakeza de propaganda sin igual a la del Hamas, del Hezbollah i mizmo del Iran. Lo ke lo metyo en situasyon del atakante malo, kuando fue el ke fue atakado. La gerra de la propaganda le izo peryer el avantaje de superyorita militar ke tuvo. Israel gano sus batalyas en los kampos de gerra ma peryo la de la injeniozita de la informasyon. El rezultado fue, ke peryo su lejitimidad internasyonala i spesialmente en los Estados Unidos el kual es su mejor aliado de sekurita i de ayudo. La administrasyon israeliana i su armada devran entender ke es un fyasko grande no tener una propaganda adekuada en las relasyones publikas spesialmente en tiempos de konfliktos.
Las gerras aktualas no son mas echas sovre muevas frontieras ma sovre narrativos; en muestro siglo no se kombate solo kon tankes, aviones i misiles, ma a traverso los ekranes de televizyon o de komputadoras, de las medias, de los algoritmos, de las redes sosialas komo Tik Tok, Facebook, WhatsApp i mas.
Los kampos de las universidades i los sistemes de edukasyon son faktores muy importantes en la propaganda ke se aze para la manseves estudiante. Las arenas de persepsyon se izyeron kampos de batalya i el ke es kapache de ganar el narrativo gana la lejitimidad internasyonala. Los inimigos de Israel entendieron bien el djugo, el Hamas, el Iran, el Katar i los elementos islamistos a traverso el mundo izyeron enormes esforsos de informasyones mintirozas sovre la gerra entre Israel i los proksis iranianos i es ansi ke krearon una emosyon negativa kontra Israel.
Empleyaron estos instrumentos ke fueron mas efektivos ke de las roketas i los drones israelianos.
Israel de su parte kontinuo a ovrar sovre modeles klasikos demodados de propaganda en uzando mesanjeros para la prensa en jeneral, en dando anchas informsyones rasyonalas de lo ke se esta pasando en los kampos de gerra, koza ke no enteresa mas el mundo aktual.
A la manseves de oy mas no les plaze meldar artikolos largos ma al kontraryo konsumen videos de Tik Tok, porke eyos no egzaminan faktos en detalyo ma reaksyonan sovre kontenidos virales ke son por lo mas echos kon la intelijensya artifisiala. Les abasta los algoritmos sovre sujetos en los kualos se kreyen.
Anyos Israel benefisyo del soporto de la opinión amerikana spesialmente de los politikos, los akademisyenes i de la elit kulturala. Koza ke troko despues del atako del 7 Oktobre onde una partida de la djuventud amerikana liberala no amostra mas amistad a Israel.
En los importantes kampos universitaryos la inimista se izo una norma kultural, los profesores adoptaron el ‘diskorso’ de Hamas sin kritikarlo i no se detenyeron de dizir ke Israel es un estado apartheid. El diskorso ansi se izo partizano i publikamente antisemito,debasho de la kacha de la lejitimidad politika. Se pensa ke este estado no vino aksidentalmente ma ke es el rezultado de un esforso bien pensado, bien lavorado por organizasyones antisemitas internasyonalas o arabas kon ajendas klaras.
El mas alarmante aspekto de esta propaganda vino malorozamente de los intelektuales oksidentales ke poko les importa el terrorizmo arabo en justifiandolo sin verguenza i en deklarando ke Israel es el perpetual agresivo. La influensa de la ideolojia islamika ensenyada por los miembros de los Ermanos Arabos del Katar i de la Turkiya da un grande apoyo a esta propaganda nefasta.
Se pensa ke Israel tiene un problem stratejiko, visto ke el no perye nada de punto de la realidad istorika. La realidad istorika i su evidensya estan kon el, basta ke el sea kapachi de enderechar su stratejiya para ke sea mas bien resivida por el mundo, sin duvda el ganara kon el tiempo esta lucha. No abasta a ke Israel sea achetado a ke aga parte integrante de la istorya del Medyo Oriente, ma ke devra azer todo lo ke es nesesaryo, para ganar la gerra de la informasyon. Es posivle de trokar el korso aktual en el kual se topa si Israel es pronto a organizar una diplomasiya publika ke trokara los paradigmos antisemitos i anti israelis en el mundo oksidental.
Selim Salti
Es ke meldatesh la eskrita de una semana antes?
Yorumlar