Mİ PRİMO MARKO,

(Teksto-Audio)

(Yazarı sesli dinlemek için tıklayınız)

Syempre fui kuryoza de mi pasado. Kuando veyo una fotografiya, un livro manko de ojas, un mantel brodado de mano ke ya se izo amariyo me da albon i me aze pensar komo se brodo kuando no avia luz. Sovre todo kuando veyo un sujeto del İmperio Otomano me toma oras para egzaminarlo. A tanto ke mis amigas se burlan de mi. Me dizen:

“tu por siguro bivites akel tyempo, eras u reyna u una djariye en el palasyo de un rey Otomano.”

Unos kuantos anyos antes me fui a viajar a la Espanya, komo konosko el ladino no me vino del todo difisil de darme a entender i kaminar sola en la kaye. Sovre todo en Andalucia me enfluensi me paresyo ke esto en las ojas de un livro de istorya. El palasyo Elhambra, Cordoba, Granada, Sevilla las kalejikas estrechas, i los nombres de las kalejas, la djuderia todo muy enteresante. Una demanyana teniyamos tyempo libre kaminando, entri a un market para empleyar siertas kozas i regalos. En supito en un tavlado vide ridomas de vino enriva eskrito “ moshkatel”. Tomi una ridoma, meldi unas kuantas vezes, si es djusto la alkunya de mi padre. Torni tomi otras doz ridomas, despues ke ya pagi torni de muevo tomi otras dos. Kreyo los ke me vyeron kon tantas ridomas de vino dizeriyan esta es borachona grande. Ami no me estava enteresando lo ke van a dizir mas ke ver la alkunya de mi famiya enriva de una ridoma de vino despues de 500 anyos.

Kuando mos asentavamos a azer sohbet kon mi madre ya este en ganeden, le demandava de mis nonos ke no los konosi. Ke echo aziyan, komo eran.

Me kontava kon pasensya. El nono de su padre era grande rav en Edirne i lo yamavan haribi Yaakov Krespin, el padre de mi padre, Mordehay Moshkatel, biviya en Tekirdağ teniya vinyas i produizava vino. İ su padre aziya este echo i el padre de su padre. Ma kuando mi papa i mis tiyos vinyeron a Estanbol, preferaron azersen komercheros….

Teniyamos muncha paryentes hanum de la madre… El tiyo Nisim, la tiya Ester…

La tiya Ester, teniya un ijo mi primo Marko… biviyamos endjundos en la kazika de Sirkedji… eramos komo ermanos kon mi primo Marko… sovre todo mi mama se muriya por el i el por su tiya Neama… kada shabat saliya del kal de Sirkedji i viniya koryendo koryendo a dezayunar . Aviya otra alegriya en akea kazika de tavla. Despues paso anyos se izo grande i se desido de ir de este pais. Kon un barko grande se fue… se fue muy leshos. Unas kuantas letras ya aviya vinido ma despues ke mos salimos de Sirkedji mos peryimos kon mi primo Marko.

Una tadre de Otonyo, la tiya Neama eskapo el echo de kaza, se arekojyo los kaveyos grizos kon dos penyizikos de sedef, se vistyo la robika de divitin, se asento a su kyoshika de siempre, tomo una chile de lana para trikotar. Penando a dezatar los anyudos de la lana, no oyo la puerta sonar. Ma la soneri ensistiya a sonar, koryo kon las charukitas de keche ke no las amargava, avryo la puerta, ve un ombre alto kon antojos godros. No topo de pensar ma el ombre se le echo en los brasos i la abraso kon grande kerensya.

”Tiya Neama buenas tardes, yo Marko no me konosites? Vine de Mexico, vine a verte, gracias al dyo ya te topi.”

Mi primo Marko despues de 35 anyos vino de Mexico a Estanbol bushko mas de tres diyas a su kerida Tiya Neama.”

Ah ke karar keriya konoserlo a mi primo Marko.

HAG PESAH SAMEAH.

Yazarın tüm yazıları için tıklayınız