LOS PROFESORES JUDYOS EN TURKIYA

Duspues del establisimyento de la Republika Turka, Atatürk se metyo a azer reformas en el payis. Atatürk se konsantro en la modernizasyon del payis bazandose en los models evropeanos. Sus planos sovre la edukasyon Turka avriyo el kamino a grandes reformas de las universitades.

El ministro de eksteryor aferes se adreso a Almanya. El governo turko estava pronto a angajarse kon profesores almanes sin konsiderar sus reljyones. Su butto era organizar un programa de reformas en las universitades. Gestapo peno muncho a impedir la departisyon de los profesores judyos ma el governo turko reusho a azer un akordo kon estos profesores.

Duspues de la muerte de Atatürk, su suksesor İsmet İnönü kontinuo su politika. El governo turko sinyo kontraktes kon munchos profesores judyos Almanes I aksepto a pagarles buenas mezadas.

Los primeros anyos estos profesores ansenyaron en sus linguas nativas kon traduktores, ma duspues del kuatren anyo, eyos deviyan de ansenyar en Turko.

El 18 November 1933, la Grande Asambleya Nasyonal (Büyük Millet Meclisi) kito una ley I ramplaso la vyeja eskola, Darülfünun, kon la mueva, Istanbul Üniversitesi.

Kon la edukasyon de los profesores, la mueva universitad, en poko tyempo, se izo uno de los mas grandes sentros de edukasyon i de investigation de Evropa.

Se fondo fakultades de linguas, Istorya, Jeografiya, Jurista i Agrikultura.

Munchos de los sientifikos se fueron a Ankara, I fondaron fakultades de arte, muzika, ı medikeriya. El ekspulzado arshitekto Clemens Holmeister ayudo a fraguar los edifisyos de la Grande Asambleya Nasyonal I el professor Paul Hindemit, el edifsyo de la opera I el teatro del Estado.

En 1935, duspues de las leyes de Nuremberg, los bibliyotekaryos fueron forsados a abandonar sus karyeras.

Estos bibliyotekaryos aplikaron un kurso de tres mezes en las libreriyas. İzyeron adelantar el sistema de libreriya en dando lekturas en las provansas, en establisando muevas institusyones i en publikando magazines sientifikas. La majoritad de estos kursos se estavan dando en las fakultades de medisina, matematika, siensya natural, siensya judika I Arte.

Aproksimo dozyentas profesores fuyeron de Almanya, los syen de eyos eran judyos.

Estos profesores kontribuaron a la organizasyon del sistema evropeena en las universitades turkas. Eyos lavoraron kon muncha kerensya, se ambezaron en turko, tuvyeron amigos turkos, I ansi fondaron pontes entre el oryente I el oksidente. Munchos denyre eyos se fueron a Los Estados Unidos, unos kuantos resivyeron la identidad turka, profesor Hirsch syendo uno de estos. Albert Einstein les ayudo muncho a fuyirsen de Almanya.

Akeyos diyas, diziyan ke la universitad de Estanbol era la mijor universitad almana fondada afuera de Almanya.

Apretar al boton para ver todos los eskritos