LA VYEJA KERE BİVİR PARA MAS VER İ OYİR
Dospues del envereno vyene el otonyo i detras el invyerno. Ayer parese ke mos fuimos a la kampanya i dishimos enveranada buena, fin ke aboltimos la kara, ya mos ogurimos invyernada buena. Mi mama diziya
(la esto nombrando porke muryo en roshashana)
“hanum los diyas estan pasando muy presto ya vyene vyernes ya vyene lunes”
Yo me burlava i le diziya
“mama un diya es 24 oras”
Agora le esto dando razon, en tomando anyikos i yo esto sintyendo los mezmos sentimyentos.
El otonyo me plaze, solo los diyas se akurtan i eskurese demprano.
El otonyo no es una sezon, es, komo dize el poeta Cemal Süreyya
“el otonyo no es una sezon es un tablo de arte”
Para mozos el otonyo es, los diyas de yamim noraim, diyas de arepintir, diyas de atorgar, diyas de arogar.
En mi chikes los moadim se fyestavan komo se deve ma agora troko la vida, no es lo ke kero yo.
Mozos semos una jenerasyon ke bivimos lo vyejo i lo muevo endjuntos, si el dyo mos da vidas ken save kualo mas va mos a ver.
Ken diziya ke kon un telefon entelijente, pizando a una tush, ivamos avlar kon la Amerika, una boda, una fyesta, mezmo un funeral lo estamos vyendo a punto en zoom. Atras 50 anyos yo en la kampanya no teniya telefon de kaza, fuimos ovligados de asperar kuatro sinko anyos para ke mos venga el torno.
El ir vinir a la ada era un evento. La frijider yena de vidreriya, la makina de lavar yena de kalsados, kamas, kolchas kolchones, chantas i torbas yenas. Agora mos vamos kon una validja. Komo troko la vida. Kuando aviyamos visto el filmo de James Bond, aviyamos kedado kuryozos, kon un boton, estavan vyendo ken vino a la puerta de abasho. Agora lo tenemos en kada kaza i kuando sona la puerta vemos ken vino. Komo estos miles de egzemplos.
Troko la vida, troko i las ideas mezmo. Al tyempo kazar kon una persona non djudyo era fin de mundo, era kortar kriya. Agora kuando mos avizan un espozoryo u un kazamyento demandamos
-Ken son los koshuegros? La repuesta es
-No los konoses ya entendemos de vista le dizimos
-Mazaltov bueno ke pasen.
Por egzemplo una si dize,
-El ijo de fulana es gay,
-Ke se aze es su preferensya seksual,
-Tu ıjo ya kazo?
-No, no se kazaron biven endjuntos,
-No emporta orozos ke esten,
-La ija de tala, dospues de kinze anyos de kazamyento se kitaron
-Si no estava oraza muy bueno izo
-La novya entro al kal la tripa en la boka,
-Bravo, Suzan se vs azer granmama en presto
Esto es adaptar a la vida moderna u dejenerasyon? No se……
Keridos lektores vini azeremos el dulse de mansana, friyeremos las köftikas de prasa, ordenaremos el seder kon la agranada i la myel i diremos
SHANA TOVA U METUKA.
Forti BAROKAS
Es ke meldatesh la eskrita de una semana antes?
Yorumlar