GERDA LERNER
- 2 saat önce
- 3 dakikada okunur
Keridos lektores
Un meziziko me kije deskansar de eskrivir ma la verdad dizere ya me eskarinyi de vozos i de vuestros komplimentos. En pasadas meldi este artikolo lo topi muy enteresante lo va partajar.
Una mujer djudia refujiada, fuida de los nazis, en los anyos 1950 en Nueva York, en la universita Columbia, oyendo la lisyon istorya, el profesor kontava las gerras, las personajes grandes ke parvinyeron a trokar el mundo i la politika. Todo esto se realizo de parte de los ombres.
Avyo los livros de istorya todo eskriviya las glorias de los ombres. Supito se revolto i echo un grito:
“ esto no es djustisya!! este no es el mundo ke bivi yo”
Porke Gerda vido la muerte kon sus ojos kuando estava en los kampos de konsantrasyon en Viyana.
“ ande estan las madres ke guadravan a sus ijos de los nazis?
Ande estan las mujeres ke traiyan a laskondida a komer a los gettos?
Ande estan estas mujeres ke gerreavan kon los soldados nazis para kedar en vida?
Agora veremos Ken es GERDA LERNER?
Gerda Lerner nasyo en el anyo 1920 en Viyana en una famiya djudia de buena situasyon. En 1938 los Nazis entraron a Viyana i en una noche troko enteramente
la vida de los djudyos.
Gerda kolaboro en sekreto kon la rezistensya. Eya ayudava a los djudyos ke kerian fuyir de Austria. Ma a la fin malorozamente la Gestapo la topo i la aferro, a eya i a su madre. Mas de sesh semanas la detuvyeron, kada diya aziyan konsulta, oras i oras, eya nunka dyo su sekreto, no toparon ni un papel ni un adreso a la fin las desharon, si topavan de vista las matavan. Entervalo el padre vendyo todo lo ke posedava, kazas, moradas, moneda i djoyas todo se los dyo a la Gestapo para ke los deshen libres.
Kuando empeso la sigunda gerra mondial (1939) Gerda fuyo a los Estados Unidos, sola, sin paras i sin saver kualo va azer.
Emprimero se ambezo en inglez, lavoro en echos diferentes, se kazo i tuvo kriaturas. Syempre le entereso la sensya de la istorya.
Gerda bivyo aryento el fashizmo, komyo haftona de la Gestapo porke no avlo, vido la dezgrasya del olokosto, kedo leshos de su famiya, malgrado todo kuando avre i melda un livro de istorya todo se avla de las ovras de ombres.
En 1950 desido de kontinuar sus estudyos. Tomo lisans i parvino a tomar el titro de doktor en la universita de Columbia. Avyo un kurso ke fin akel tyempo dingunos no pensaron esta manera una idea.
“kurso de istorya de mujeres” en la New School de Nueva York.
Antes, no egzistiya istorya de mujeres en las lisyones de universitas.
Izo investigasyones no solo kon mujeres komunas, kon mujeres ke lavoran en echos fuertes, kon mujeres ke organizan asosyasyones, topo diaryos, letras i eskritas, nombres de organizasyones de mujeres. Sus elevos estavan muy kontentes.
Dospues no kedo solo kon dar lisyones. En el anyo 1972, fondio el primer program de maestra en “istoria de las mujeres” en Sarah Lawrence College, en 1980, fondo el primer program de doctora en “historia de las mujeres” en la Universidad de Wisconsin-Madison.
Una demanyana se esperto kon un haber ke los profesores (ombres) de istorya se revoltaron, dizyendo ke esta lisyon no tyene bastante emportansa. Gerda no dyo emportansa, a la kontra lavoro mas muncho, publiko ovras akademikas i mostro ke no ay solo ombres en los livros de istorya a la kontra ay mujeres muncho mas eksitozas de los ombres.
Gerda Lerner mostro al mundo la fuersa de las mujeres, ambezo a sus elevos ke en el mundo no ay solo ombres ambezo ke la mitad de la publikasyon del mundo son mujeres.
Gerda Lerner muryo el 2 Enero 2013 a los 92 anyos.
Oy en dia si meldash un livro sovre la “İstorya de mujeres” no vos olvidesh de remersiar a Doktor Gerda LERNER.
ALVERMOS SHANA TOVA U METUKA.
Forti BAROKAS
Es ke meldatesh la eskrita de una semana antes?
Yorumlar