LA VİDA DO POR EL RAKİ
- 21 saat önce
- 2 dakikada okunur
En una tadre, en Estanbol en el Bosforo, en una meyana, mirando las olas de la mar, el syelo ennuvlado, en la meza de allado dos ombres avlando las problemas del pais, yo miri al vazo yelado de raki ke taniya en mi mano i dishe de mi para mi;
“ Komo de koza sos tu? Te pueden bever en un bodre de mar enburujado en una gazeta, i te pueden bever en una meza kuvyerta kon un mantel blanko enkolado, kon aperitivos ma no troka ni los penseryos, ni la melankoliya ni la alegriya”.
El raki no es komo bira, la bira la beven todos, el viski te kema el garon, ma el rakı tyene una silueta, su golor es amor, su savor es vida. Tyene un titro “Meza de raki.”
Kuando estas kon la melankoliya korres a una taverna. El raki no se beve para topar remedyo, se beve para olvidar. Es la bevida nasyonal de Turkiya, bevemos esta bevyenta ke gole el anason asta la ultima esperansa, asta la muerte.
El raki es la sola bevyenta ke se beve kon dos vazos? Komo la alma i el puerpo, komo dos amantes, komo la noche i el dia, komo oyir los problemas del de enfrente, todo se reuna en los muchos komo bezos de amor.
Si no egzistiya el raki, las kantikas kedavan guerfanas, esta bevyenta tyene una kapachedad de azerte olvidar tus penas tus ansyas. Yo lo bivi, por esto lo se. Una tadre en bevyendo me salyo de la boka, les diche a los amigos
“Este echo es enposible” me respondyeron “en lo emposible mezmo ay una posibilidad” komo dizen: el raki aze avlar.
El raki se envento ke menester de ir al psikologo, ay muncha djente ke dizen bever es pekado, es amargo, desha ke avlen....
kuando te reunas en una meza i avlas kon amigos, te topas en otro mundo, kontas, riyes kon ironiya. No te olvides! El vino es para los ke biven, el rakı es para los ke no alkansaron a sus amores.
Aze atansyon kon ken vas a bever i deke esta bevyendo raki. Es verda ke los vazos se alevantan por el de allado de ti, en verda se alevantan por el ke tyenes en el tino. Es muy ermozo de ir a bever kon amigos ma no te olvides ke bever raki kon una mujer ke keres byen es otro.
Es ke en tu vida tyenes bevido kon una mujer ke todo su amor lo kargo en sus ojos? No puedes saver la ermozura de bever raki kon una mujer ke te ama.
Si en una meza no ay una mujer, absolutamente ay una meza de rakı por una mujer.
Eskrito por AYDIN BOYSAN
Tradyksyon FORTİ BAROKAS
Forti BAROKAS
Es ke meldatesh la eskrita de una semana antes?
Yorumlar