ANNA FRANK
- Forti BAROKAS
- 30 dakika önce
- 3 dakikada okunur
El 27 de Enero, es el aniversaryo de la liberasyon del kampo de konsantrasyon Auschwitz-Bikenau (1945)
Dia International en Rekuerdo de las viktimas del Holokosto por la Asamblea General de las Nasyones Unidas en el mez de Novembre 2005.
Sovre este sujeto ay miles i milyones de vidas i se puede eskrivir una biblioteka de livros. Ama kuando se dize holokosto, a mi me vyene al tino EL DIARYO DE ANNE FRANK. Porke era el primer livro ke meldi en este sujeto, en ke mi chikes.
Por siguro ke todos konosen esta istorya, yo penso ke kale repetarla para no olvidar el pasado.
NUNKA MAS
Anne Frank nasyo en Frankfurt Almanya en el anyo 1929.
Hitler detestava a los djudyos i los kulpava de los problemes del pais. Por esto el padre de Anna, Otto i la madre Edith Frank, desidaron de ir a bivir a Amsterdam. Otto Frank fondo un echo de pektina, una azete de jel ke se utilizava en las marmeladas. Anna, en poko tyempo se adapto a este pais, se fue a la eskola, se ambezo la lingua i topo amigas a su edad.
El 1 de Septembre 1939, Anna apenas teniya 10 anyos, empeso la sigunda gerra mondial, poko dospues los Nazis entraron a Hollanda. La vida de los djudyos se izo mas difisil. Los Nazis ovligaron a meter la estreya de davit en sus vistimyentas, defendyeron ke dingun djudyo no puede entrar a los parkes, sinemas i separaron las eskolas. Los djudyos fueron ovligados de ir solo a estas eskolas.
En la primavera de 1942, el padre de Anna, topo un lugar para eskondersen. El lugar era muy estrecho, Anna no deviya de azer bruido i estava kon espanto.
Antes de eskondersen Anna resivyo un diaryo en su aniversaryo de 13 anyos. Ayi eskriviya sus sentimyentos i pensamyentos. Tambyen eskrivyo konsejikas i eskritas de los livros ke meldava. Eskrivir le ayudava a pasar el tyempo.
Anna estava eskrivyendo un livro sovre sus rekuerdos ma malorozamente antes de eskaparlo, la polisiya la topo. El 4 de Agusto 1944. El ekipo de bushkar djudyos, anonso ke un myembro de un Noter nombrado Arnold Vanden Bergh, para salvar su famiya los dyo en mano.
En la operasyon, malgrado ke destruyeron todas las eskritas, unas kuantas fueron guadradas.
La famiya Frank fueron yevados al kampo de konsantrasyon de Auschwitz-Birkenau. El viaje kon treno, duro tres diyas i tres noches. En un vagon aviya kaji 100 personas, komida i agua no abastava i por tualet lo ke aviya solo una bota para todos.
Kuando arivaron a Auschwitz, kaji 350 personas fueron mandados a las kamaretas de gaz.
En el mez de Novembre 1944 Anna fue mandada al campo de konsantrasyon Bergen-Belsen. De komer no aviya, el tyempo friyo i una epidemiya de Tifüs. Povereta Anna no puido mas resistir i en el anyo 1945 muryo de tifus.
Kuando eskapo la gerra el solo ke kedo en vida fue OTTO FRANK.
Otto Frank, dedikado a kitar el livro de su kerida ija Anna. Izo lo ke izo en 1947 parvino a publikar este livro.
“El diaryo de Anna” alkanso una fama mondial, se traduizo a 70 linguas, se adapto al teatro i al sinema, todos konosyeron la istorya. En 1960 el lugar ande se eskondiya se izo muzeo.
El livro empesa kon estas palavras:
“Lo ke teniya 13 anyos, mas de dos anyos bivi kon espanto, eskondida, afrita de avlar de riyir en gritando i de mirar por la ventana.
Ansi empesi a eskrivir en mi diaryo, eskrivir era la unika manera de imajinar. Lo mas difisil era el silensyo. No saviya ken estavan bivos, eske un diya va korrer en la kaye? Eske un diya va pueder ver el syelo sin tremblar?
No teniya libertad ma kada fraza ke eskriviya me dava fuersa para rezistir.
Un diya ya oyi la boz de los pasos, la Gestapo ya mos topo, ya mos estan yevando a los kampos de konsantrasyon, peryi a mi madre, a mi ermanika, pedri todo.... solo una koza no pedri, la kreensya
Ya se, Yo no va bivir ma mis palavras van a bivir
En vezes mezmo si peryes todo, tus palavras pueden gerrear por ti”.
NUNKA MAS.
Forti BAROKAS
Es ke meldatesh la eskrita de una semana antes?
Yorumlar