LA BÜYÜKADA.

Kuando vyene enverano, ya empesamos a azer planos de vakansas. Yo, mezmo si me vo a viyajar, dospues de unos kuantos diyas ya kero tornar. Para mi enverano, la mijor vakansa es la Büyükada ke ay sinkuenta anyos ke me vo. Muncha djente dizen, la ada ya eskapo, esta yena de arabos, la eskala no esta de kaminar, el charshi dezgrasya, una prezyon moderna barminan…

Mirando de esta parte, todo lo ke estan diziendo es muy djusto. Kale atorgar ke la Büyükada no es la isla ke konosiyamos atras 40 anyos. Troko todo, por empesar se avyo marketes grandes i siguro muryo los bakalikos. Todos se izieron vendedores de döner i lahmadjun. Salyo los motorikos ke lavoran kon elektrisita, ken i ken tomara para no suvir las suvidas . Afilu los chirakes del market, si no ay motor en las bisikletas no keren lavorar. No kedo kazikas vyejas de tavla ke no se izieron oteles. De akea elegansa ke abashavamos a la eskala i aresiviyamos a los maridos ke abashavan al echo kon djaketas blankas de keten i mozos las mujeres kon fostanes de emprime, no kedo sumbulturya.

Agora todos abashan a la eskala kon bermudas i taytes afilu ke munchas damas vyenen 90 kilos. Kon kaveos ingridos i mojados eskuryendo las aguas de mar i unos tokyos en los pyezes.

De vez en kuando avlamos kon los vyejos moradores de la isla i dizimos kualo es lo mijor?

Para mi no ay de komparar, akel tyempo era esta manera agora es esta manera. Siguro ke kon los anyos troka todo.

Mezmo mozotros kon la teknolojiya trokimos seya de vistimyentas seya de ideas.

Antes 40 anyos ken diziya en kaminando en la eskala de la isla ke va avlar kon telefon kon mi ijo ke estava en Amsterdam. El me amostro el kafe ke estava asentado i yo le amostri la ora de la eskala. De sorte este trokamyento kale akseptarlo.

En turko ay una dicha muy djusta

“Zaman sana uymazsa sen zamana uy”

“Si el tyempo no te uydea a ti, tu uydea al tyempo.”

Yo este estado negro no lo veyo (no lo kero ver).

Prefero ver la otra parte del madalyon.

Yo veyo, demanyana demprano el aver limpyo i la kayades, las bozes de las gaviotas, la verdura, los arvoles yenos de begonviles, un gatiko durmiendo enriva las yervas, i un brote de roza ke ya esta para avrir.

Kuando abasho a la eskala no veyo a los pretos veyo konosidos ke no los vide invyerno entero, entro al charshi todos los vendedores me saludan, porke ya estan orozos ke vinyeron los kampanyeros i ya estan prontos para pujar los presyos.

Despues ke empleyi me asento en el kafiko de la eskala enfrente de la mar, tomo un chayiziko, me aze plazer azer sohbet kon los konosidos.

Estas ermozuras ke veyo yo, no se si las ven las ke se keshan de la ada. Ama kreyevos, todas las ke dizen la ada ya eskapo, mas no se vyene, ya estan espandidas en la plaj, bevyendo raki en el restoran i dando tornos en la eskala antes de todos.

Ande morava un tyempo teniya doz vizinas.

Demanyana, la una, si aviya luvya, muncho mal,

“No ay mar komo de tyempo esta, el lavado no se va enshugar, los djames se ensuzyaron”

Si esta kalor:

“Of oy esta muncha kalor, no se sale a la kaye, esta murir.”

La otra, si aze luvya:

“Ke ermozo ke esta golyendo la tyerra, oh arefresko.”

Si esta kalor,

“Es su tyempo, ayde mos iremos a la plaj.”

Ke dishimos pensar negatif pensar pozitif.

Vakansas alegres a todos.

Apretar al boton para ver todos los eskritos