HELENA RUBİNSTEİN.


En una noche byen yelada, el anyo 1880 en Krakova nasyo una ijika djudia nombrada Chaya.
Dingunos no puediyan saver ke el iguente de laneolin i de syertas yervas ke le fregava su madre al puerpo, un diya va ser una marka famoza en el mundo entero.
Chaya a la kontra de otras ijas de su jenerasyon, era fuerte de karakter i korajoza. Kuando teniya 17 anyos el padre la kıjo kazar kon un komersyante grande de edad i byen riko . Ma eya disho su palavra de alkavo
“NO KERO”
El padre furyozo la inyoro i la echo de kaza. Chaya akea noche ni le dyo repuesta ni yoro, tomo una desizyon de vista se troko el nombre.
“yo de agora endelantre me yamo HELENA, HELENA RUBİNSTEİN”
A partir de esta noche la vida de Helena troko enteramente.
Partyo a Viana i empeso a estudyar medisina. A los 24 anyos, sola, sin saver un byervo en ingles partyo a Australya. Lo ke posedava era unas kuantas vistimyentas i unos kuantos kavanozes de la krem ke preparava su madre. Debasho del sol kemador de Melbourne, su kara estava briyando, todas las mujeres estavan admirando su kara, kuryozas le demandavan “ke es tu sekreto”?
En 1902 kon paras emprestadas avyo un chiko salon. Las mujeres asperavan oras en la kola de la puerta de la botikita para merkar.
Helena no les vendiya solo krema, les dava konfiensa ke todas las mujeres pueden ser ermozas, les topo echos para ke lavoren, les dyo koraje.
De Melbourne a Sidney, de Sidney a Londra, de Londra a Paris i finalmente a Nueva York.
En 1915, la gerra, las krizas ekonomikas, un mundo dominado por los ombres ma eya fue kapache de reushir sin ayuda de dingunos.
Un dia, en Nueva York se enkontro kon una mujer ke le troko su destino. ELİZABETH ARDEN. Se detestavan, se arebashavan eran enemigas, ma no savian ke este selo las aziyan mas altas i las adelantava en el mundo entero.
La grande viktorya de Helena fue en el anyo 1928. Vendyo su imperyo a LEHMAN BROTHERS por 7 milyones de dolares. Todos la yamaron loka le disheron ke peryo el meoyo. Eya a estas palavras se estava riyendo, porke estava djugando una partida mas ambisyoza.
En el mez de Oktobre 1929, de la noche a la manyana la ekonomiya del pais kayo en un estado muy negro, los merkaderes falitaron, las kayes yenas de suisidados ke peryeron sus echos sus paras i sus kazas.
Entonses Helena, las aksyones ke avia vendido akel tyempo, las merko de muevo, oy le valyeron 100 milyones de dolares. Todos en peryendo Helena salyo ganada.
Helena se kazo 2 vezes. El primer marido era elegante ma teniya el ojo en otras mujeres a la fin eya lo desho. El sigundo era un rey ruso ma era 23 anyos mas chiko de eya. Djusto ke topo su verdadero amor, muryo mansevo, otra una vez kedo sola.
Ansi pasaron los anyos, eya nunka kedo ni de lavorar, ni de krear.
Una demanyana en su apartamento de Park Avenue, tres ombres kon armas en las manos, rompyeron las puertas i entraron a su kaza. Los ladrones keriyan las djoyas ke valiyan kaji un milyon de dolares.
Helena estava dainda en la kama. Los ladrones:
“ damos las djoyas si no te matamos”
Helena se alevanto de la kama i les respondyo
“ yo tengo 92 anyos si keresh matame! Ma no puedesh tomar de mi ni una pyedra de mı djoya, ni un tablo de mi kaza ni un kavanoz de krem. Vozos sosh 3 ladrones, yo, so un imperyo, agora toma estos 200 dolares ke gani anoche en el djugo bridge i arrematavos”
Helena muryo el 1 Avril 1965 a los 92 anyos i fue enterrada en el simiteryo Mount Olivet.
Sus palavras de alkavo
“Mujer feya no ay solo ke se mire”
Forti BAROKAS
Es ke meldatesh la eskrita de una semana antes?


Yorumlar