-Z A R A –DETERMINASYON I VIKTORYA
Me yamo Amancio Ortega avri los ojos en Espanya Galıchia aryento la provedad. En mi kaza mas de komer aviya silensyo, porke kuando estas ambyerto no tyenes fuersa ni de avlar ni de esperansa. Nunka me olvidi en un diya de luvya i friyo lo ke teniya doche anyos, mos fuimos yo i mi madre a un bakaliko. Mi madre kon una boz kalma i aveguensoza demando pan i unas kuantas kozas para artarmos. La repuesta fue:
“sinyora la devda ya te pujo muncho mas no te puedo dar”
Esta palavra me entro komo un kuchiyo al korason.
Akeas oras me di palavra ke la provedad no va ser mi destino.
De vista deshi la eskola i empesi a lavorar en una botika ke vendiya kamizas. Komo no meldi, el dover miyo era yevar los paketos a los klientes. Este echo para mi era komo ke esto meldando en la universita. A la salida del echo viniya a kaza muerto kansado, nunka me keshava porke en kada paketo me estava ambezando las finezas del echo i fin demanyana pensava i imajinava el diya ke i yo va parvinir. Dospues de un buen tyempo, kon mi kompanyera de vida, en kaza, empesimos a kuzir shemizes i robas. No teniyamos ni botika ni moneda. Solo entre los dos, lo ke teniyamos una grande konfiensa, rezolusyon i kerensya. En akeas nochadas de invyerno kuziyamos los botones de las shemizes en tremblando porke no teniyamos moneda de merkas lenya. Una noche de Noel en no estando en kaza toda la ropa mo la arovaron. Me aharvi, yori, me kije matar. Supito me vino al tino akea noche kuando teniya doche anyos, las lagrimas de mi madre. De vista me alevanti de enbasho i empesi a lavorar.
En 1975 avrimos una botika byen chika el nombre le metimos ZARA.
Primeros tyempos empesimos a vender a presyos baratos ama de buena kalitad. Barato i bueno, esto era una revolusyon a la provedad ke travimos. Oy akea botikita ke no teniya tualet parvino a ser una marka enternasyonal i ay kaji 90 botikas en partes del mundo entero.
La djente me yaman “komersyero grande” para eyos puedo ser komersyero grande ma para mi so akel ijiko ke vido las lagrimas de su madre i djuro i se dyo palavra ke nunka mas va ver akeos diyas malos.
Porke yo en mi chikes no konosi el lukso ma se muy byen kualo es ganar kon sudor. No meldi ma tomi una buena lisyon de vida.
El respekto no es las vestimyentas karas, el respekto es, en la ora negra de estar empyes i la kavesa en alto. El pasado no es una kayida a la kontra es un tramplen ke te echa mas adelantre.
Nunka no te olvides de akeos diyas i nunka no te espantes de echar el primer paso. Lo mas negro es renonsar si gerrear. Nunka no te olvides ke las mas grandes reushitas nasen del dolor profundo.
Forti BAROKAS
Es ke meldatesh la eskrita de una semana antes?
Yorumlar