FLORA KLEİN
De Auschwitz a las alturas del grupo KİSS.
La istorya de una madre ke peno a kedar en vida i la erensya ke le desho a su ijo regalado.
Flora Klein nasyo en 1925 en una famiya djudia, en Hungaria sin tener haber de su destino oskuro. Nunka puediya imajinar lo ke iva travar en los kampos de konsantrasyon.
En 1944 los nazis, okuparon Hungaria. Una noche eya i su famiya fueron tomados de sus kazas i kon un vagon de un treno de beemas, fueron yevados al kampo Auschwitz-Birkenau. En este kampo en unos kuantos mezes 400.000 djudyos hungaros fueron matados. Flora i su ermaniko chiko Lary, salvaron grasias a un mıraklo ke eyos mezmo no kreiyan. El resto de su famiya dyeron la alma en las kamaretas de gaz.
Dospues de la liberasyon, en 1945 Flora fue yevada a un kampo de abandonadas ke no teniyan famiya. Dospues de unos kuantos anyos en 1949 en İsrael Hayfa konosyo a Yahiel Witz, se kazaron i tuvyeron un ijo HAYİM WİTZ.
El kazamyento duro ocho anyos. Flora desido de emigrar a los estados unidos. Paras no teniya en inglez no saviya lo ke teniya solo a su ijo, koraje i una esperansa de darle una vida mijor.
Primeros tyempos se enstalaron a Washington i dospues a Queens. Flora empeso a lavorar en una fabrika de ropas, para ganar un poko mas, lavorava i las noches, nunka kijo kazarse otra una vez. Nunka no avlava de los kampos, nunka kontava lo ke travo, su kayades i su espanto de kedar ambyerta mostrava su pasado. Todo lo ke posedava mezmo una miğita de pan la guadrava, de lo poko se kontentava i ansi lo engrandesyo a su ijo Haim. De vista lo mando a la Yeshiva Torah de Voaas dospues al College of Staten Island i dospues Sullivan Country Community College. Entremyentes empeso a enteresarse a la musika i se troko el nombre.se metyo GENE SİMMONS.
El ijo tomo dos lisyones de vida de su madre i nunka se las olvido tanto ke bivyo. La una era
“nada no es enposible en la vida”
la sigunda era
“ kedar en vida es lavorar mas muncho de todos”.
Estas dos lisyones de vida, a Haim Witz, le sirvyo a formar una grande estreya de rock.
Fondo el grupo KİSS i el fue el tanyedor de bas gitara del grupo. Kon su makyaj marjinal, kon sus performanses de bayles parvino a ser un imparator de la musika rock.
Flora ayego a ver la fama i la rikeza de su ijo regalado. Para si nunka aspero nada.
Kuando vino a los 80 anyos, empeso a kontar su istorya amarga i permetyo ke eskrivan sus travalyas en los livros, porke el tyempo estava pasando i los sovrevıvantes sestavan muryendo. En un reportaje izo una deklarasyon i disho:
“el olokosto den dia en dia sesta inyorando, de sorte kero ke mis inyetos i su jenerasyon ke sepan de ande vinyeron i ke no se olviden lo ke travaron sus antepasados”.
Akel ijiko Hungaryo nombrado Haim, ijo de Flora Klein salvada del Holokosto i Yahiel Witz un lavorante byen prove, nasido en Haifa İsrael en 1949. Akel ijiko ke tomava pan i leche kon kartas de rasonamyento a los 7 anyos, akel ijiko ke vendiya frutas en las kalejas para ayudar a su famiya, akel ijiko ke emigro kon su madre a los 8 anyos a los estados unidos.
Oy GENE KLEİN SİMMONS un imparator del gruop KİSS eskritor de las palavras, kompozitör de las kantikas i riko de milyones de dolares.
En kada entrevista seya en la televizyon seya en los konseres, syempre repeta las mizmas palavras.
“Oy todo lo ke so, se lo devo a mi madre, eya salvo de akel diavlo i peno vida entera para engrandeserme. Nada no se se puede komparar kon sukoraje i ardor de bivir”
Forti BAROKAS
Es ke meldatesh la eskrita de una semana antes?
Yorumlar