AYUDAR

Ay unos kuantos anyos, ke salyo una moda de reiki, fengshui, yoga, penseryos negatif, penseryos pozitif etc. Yo nunka no me ondeyi a estas kozas ma komo me plaze ambezar, munchas vezes me topi en konferensyas i semineres a este sujeto.

Yo, kreyo ke en la Tora egziste todo modo de moral, de filozofiya i eksplikasyones maraviozas. Antes 50 anyos kuando avlavamos una koza negra, te toda manera mi nona mos diziya:

“Keridaskita bueno de la boka.”

No so deltodo relijyoza ma me plaze los moedes, las tradisyones. Achakes de los moedes i las tradisyones se adjuntan las famiyas. Siempre digo bueno ke tenemos la noche de Shabat. Malgrado ke mis ijos lavoran en unos ofisyos diferentes.

Por egzempyo el ijo grande tyene un grupo de müzik ke se yama DUMAN i munchas vezes una noche de moed puede estar en turne, en Berlin en Ankara. El ijo chiko lavora en una estasyon de radyo ke ayi no ay ni ora ni diya porke aze transmisyon en bivo. Primeros tiempos ami i al defondo de mirado mos embarasava ke los ijos no estan en la meza. Agora ya me auzi esto es sus preferensyas, echos buenos ke tengan, ke no me manken kuando pueden ke vengan enriva la kavesa.

En mi chikes, (dizen ke akodrar de lo viejo es siman de vejes Atorgare ke para la manseves no me esto indo)

Es verda ke mi alma kedo en los 40 anyos ma el nifus ya save la verda.

Ayudar i apiyadar es ermozo, esto mos anbezaron los padres. Kada vez ke no keriya komer, mi nona me kontava esta konsejika para darme egzempyo ke kale ayudar ma no komo la konseja.

Avia de ser un buen de naser, en una sivdad, biviya un ombre muy prove sin echo i sin moneda. En la mezma sivdad bivyia un otro ombre muy muy riko ma muy eskaso. Este ombre riko, un diya, desido de trokar kaza, tuvo menester de un portador para transportar los mobles. Los vizinos le rekomandaron al ombre prove, para ke le ayude i ke gane dos tres groshes. El prove ke oyo ke ay un echo, se fue en koyiendo ande el ombre riko, le disho ke esta pronto para ayudarle.

El riko komo era muy muy eskaso le disho al prove:

-Mira pasha yo paras no do

-Komo sinyor? Debaldes va lavorar?

-No, yo te va dar tres konsejos buenos, ke te valir muncho.

El prove, povereto, penso penso i disho desi parasi

“Yo fin agora en la vida ke echo ize no me reusho, akseptare puedeser un konsejo de este ombre riko me aze hayre”

İ acheto a lavorar debaldes.

Eprimero yevo los mobles, dospues, muerto kansado tomo la kufa bien pesgada, yena de vidros i kristales presyozos i empeso a suvir las eskaleras. Kuando vino al sigundo etaj, el riko le disho:

“Ya vino la ora de darte los konsejos agora oyeme bueno:

-Uno, si te dizen ke el riko i el prove es la mezma koza, no te kreyas

-Esto ya lo se muy byen sinyor.

Pensando ke los otros dos konsejos le puede aprovechar, tomo la kufa se la eço al ombro i empeso a suvir. Kuando vinieron al kuatren etaj el riko le disho oyeme:

-Dos, si te dizen ke el arto kon el ambyerto es la mezma koza no te kreyas

- I esto ya lo se sinyor

Kon esperansa ke el treser konsejo le va valir, tomo la kufa i empeso a suvir las eskaleras dalkavo. Kuando vinyeron al syeten etaj, muerto kansado, aryento la sudor, el riko le disho:

-I agora ya vino la ora de darte el treser konsejo oyeme:

-Si te dizen lo preto kon lo blanko es la mezma koza no te kreyas.

El prove mas no pudo rezistir. Kon una birra, le da una punta de pye a la kufa i la echa de las eskaleras abasho. Todo se rompe se aze sal i siniza. El riko no topo de pensar le disho en gritando kon inyervos:

-Ey!!! ke izites loko sos?

El prove le respondyo en fuyendo:

-Sinyor! Si le dizen ke en la kufa kedo un vidro sano ke no se kreya.

ENVERANADA BUENA.

Apretar al boton para ver todos los eskritos