LA TRAJIKA MUERTE DE CHELEBI BEHOR KARMONA

Kuando los djudios ke avian sido ekspulsados de Espanya yegaron a las tierras del Imperio Otomano i se aresentaron en sivdades komo Estambol, Edirne, Saloniko i mas, eyos bushkaron a mantenersen, en la mizura ke podian, de los ufisios i profesiones ke tenian ainda en Espanya.

Ansi es ke uvo entre eyos merkaderes i butikarios, rabinos i fonksionarios de la komunidad, artezanos, medikos i tambien ombres de finansas ke kumplian fonksiones ofisiales para las kualas kalia tener grandes fondos. Uno de los postos mas importantes ke tuvieron era el de trezorero de los yenicheris, los soldados de elita otomanos ke en su tiempo avian yevado al Imperio de viktoria en viktoria, ma ke en el siglo 19 eran un grande manadero de problemas i a vezes metian en kestion la otoridad del sultan turko.

En la primera.metad del siglo 19, uvo en Estanbol tres djudios ke kumplieron este posto, i entre eyos Chelebi Behor Karmona ke tuvo una trajika muerte.

Behor Karmona era uno de los mas rikos i influentes djudios de su tiempo. El era yamado “Chelebi”, titolo turko ke sinyifika “ombre galante, persona edukada”. El se avia echo riko del komersio de shap (alum) i era yamado “Shapchibashi” (en turko, “prinsipal merkader de alum”).

En tanto ke trezorero de los yenicheris, Chelebi Behor era el ke kontrolava sus salarios. Kuando los soldados se topavan a kurto de moneda, el tambien emprestava fondos a sus komandantes i eyos a sus torno avansavan moneda a los soldados al kuento de sus salario. Estas avansas eran dadas kon intereso i Karmona se espartia las ganansias kon los komandantes del kuerpo.

Ma kon toda la fuersa finansaria i la influensa ke le davan este posto i sus relasiones kon la mas grande fuersa militara de Turkia en su tiempo, Chelebi Behor Karmona tuvo una fin trajika.

En 1826 esbrocho en Turkia una grave kriza interiora en la kuala el kuerpo de yenicheris se revolto aviertamente kontra las otoridades. Siendo ke el problema de los yenicheris ya estava preokupando dezde muncho tiempo a la Sublima Puerta, el sultan Mahmud II desidio de dezbarasarse de este kuerpo una vez por siempre. I en efekto, en segito a las duras mizuras ke fueron tomadas kontra estos soldados, el kuerpo de yenicheris fue dispersado i en su lugar fue formada una mueva fuersa militara. Kon la abolision del kuerpo de los yenicheris, sus lideres i dirijentes tambien fueron eliminados. Este dezvelopamiento no kedo sin tokar al trezorero tambien, Chelebi Behor, ke akel tiempo era el lider de la komunidad djudia de Estanbol i era muy amado por sus korelijionarios.

La fin de Karmona mos es kontada por el istoriador Moshe Franko, en su livro Essai sur l’histoire des Israelites de l’Empire Ottoman depuis les origines jusqu’à nos jours.

« Una tadre de viernes – eskrive Franko en este livro – kuando Behor Karmona i su famiya estavan reunidos para selebrar el Shabat en el palasio onde morava, en Kurucheshme, por la ventana vieron aserkarse una barka kon dodje ramadores embiados por el sultan.

Dientro kurto tiempo vieron dos pretos entrar i demandar por Karmona. Al prinsipio fue el ermano chiko, Hezkiya Karmona, ke se prezento, ma kuando se aklaro ke no era a el ke bushkavan, los pretos se dirijeron verso el ermano grande, Chelebi Behor, lo aogaron en el lugar mizmo, enveloparon su kuerpo kon una estera i lo desharon delantre la puerta del palasio.

La komunidad djudia de Estanbol i del Imperio entero, fue profondamente chokada al oyir sovre la exekusion de su lider. Segun Franko munchos djudios, viejos i mansevos, fueron a Kurucheshme para asistir a los funerayes. La dolor por su muerte se reflekta, entre otras, en una endecha ke fue eskrita entonses i de la kuala damos aki las primeras strofas :

Adjuntemos mis ermanos/ a kantar esta endecha

porke mos korto las manos/ el Dio en esta echa.

Banim Yetomim kedimos/ komo guerfanos sin padre

los ojos al Dio alsemos/ ke de mas mal mos guadre

Chelebi Behor Karmona/ afamado por el mundo

de los djudios korona/ i Adjiman el segundo

De ver komo los mataron/ a kada uno de una muerte

de los ojos mos saltaron/ lagrimas komo la fuente…

La memoria de Chelebi Behor Karmona fue guadrada por muncho tiempo, entre otras en kantando esta endecha en los dias de Tisha be-Av, djuntos kon las endechas por la Destruksion del Templo.