ZEKİ MÜREN i SU PRİMER AMOR
- Forti BAROKAS
- 3 saat önce
- 3 dakikada okunur
Zeki Müren nasyo en el anyo 1931 en Bursa. Para kompletar sus estudyos vino a Estanbol i entro al Liseo Boğaziçi. Dospues entro a la akademia de Bellas Artes Sabih Gözen, al departamento de dekorasyon. Durante sus anyos de estudyante, realizo ekspozisyones de desen echos por su mano.
En estos anyos se namoro de una ijika de su klasa. Eya fue la unika mujer ke amo en su vida. Kon eya lavoravan endjuntos i organizavan ekspozisyones. Zeki Müren, en mezmo tyempo tomava lisyones de musika i adelantava porke teniya ermoza boz i muncho telento.
Kuando esta ermoza ija le propozava de ir al etranjero para profesyonar su dizayno, el no la sintiya porke nunka no keriya abandonar la Turkiya.
Se keriyan muncho byen, pasavan todo diya endjuntos i kaminavan todos los lugares de Estanbol. Ande se ivan, metiyan el nombre “guerta de amor”. Entonses Zeki Müren estava adelantando en la muzila i sus profesores estavan siguros ke un diya va tener un lugar espesial en Turkiya.
Un dia Zeki la yevo a su kerida a una de sus lisyones. Kuando eskapo la lisyon, el profesor lo tomo a la kamareta i le disho:
-Tyenes un talento maraviyozo, esto siguro ke vas a alkansar un grande sukseso en la musika, no deves de okuparte de nada mas ke la musika,ke sepas ke en tala data, yo te eskrivi para un egzamen de la TRT.(RADİO TURKO)
Komo la puerta de la kamareta estava entornada, su kerida oyo toda la konversasyon.
Al otro dia, no vino ande se ivan a topar.
La famiya de eya keriyan ke sus ija, estudye en Paris i ke adelante en su sukursal ma eya esperava konvenser su kerido amante i partir endjuntos. Dospues ke oyo las palavras del profesor tomo una desizyon seryoza.
Si avlava kon el, eya ya saviya ke el nunka no keriya espartirse de su sivdad i tambyen ya saviya ke va adelantar en la musika. Si ensiste iva destruir sus ilusyones i eya mezmo no keriya renonsar de sus ilusyones de modelista. De vista avlo kon el padre i le izo tomar un bilyeto de avion para Paris.
Para no travar remorso tomo un papel i un kalem i le eskrivyo una letra, dizyendo:
“Mi amor, yo desidi de irme a Paris. No kije ser responsable de destruir tu talente i tus ilusyones. Si kedo aki, va destruir mis ilusyones. Aunke me erguele el korason tomi desizyon de irme. Me vo detras de mis ilusyones kreyo ke i tu vas a reushir en tu kamino de musika. Ni tu sos sufisante para mi, ni yo para ti”.
ADİYO,
Esta letra le paso a la mano de Zeki Müren dospues ke se fue su kerida a Paris. La meldo puedeser mil vezes, estava triste, noche entera no durmyo i kompozo esta kantika inolvidavle.
Şimdi uzaklardasın, gönül hicranla doldu
Hiç ayrılamam derken kavuşmak hayal oldu
Sevda bahçelerinin çiçekleri hep soldu
Hiç ayrılamam derken kavuşmak hayal oldu
Agora estas muy leshos, mi korason esta yeno de dolor
Dizyendo nunka no me va espartir agora, reunir es un suenyo
Saves ke Las flores de muestra “guerta de amor” se amurcharon
Dizyendo nunka no me va espartir agora, reunir es un suenyo
Forti BAROKAS
Es ke meldatesh la eskrita de una semana antes?
Yorumlar