EL PASHARİKO DE TROTUARES

TÜRKİYELİLER BİRLİĞİ התאחדות יוצאי תורכיה
5 gün önce
3 dakikada okunur

En el argo fransez, la palavra “puta” se empleya por “pashariko de trotuares”.

La vida de este pashariko de trotuares es una istorya reel, una istorya ke se puede renkontrar solo en los kuentos. Una vida difisil i yena de dolores, una vida de una mujer muy renomada i tanto maloroza. EDİTH PİAF.

Editf Piaf nasyo el 19 desembre en 1915. En unos diyas muy oskuros i teribles de la primera gerra mondial. Ija non dezeada de su propya madre. Su madre era emigrante İtalyana i su padre homoseksual. Sus echos eran asperar ombres en las kayes i pasar las nochadas en un otel. No teniyan ni una kaza para morar.

Djusto en esta mizerya nasyo la dezmazalada Edit. No teniyan bastante posibilita de alimentar esta kriatura de sorte kedo flaka i peryo la vista.

Su padre konosiya una mujer ke teniya una kaza en Paris onde lavoravan mujeres putas. Apenas Edith teniya un anyo el padre la yevo aya i le arogo ke la tome. La mujer es verda ke se adjıdeyo i la tomo ma en esta kaza komo se puediya mirar una kriatura. En los livros de su vida eskrive ke Edith fue kriada por andjelos.

Los anyos pasaron, Edith se engrandesyo en lavando las vistimyentas suzyas de las mujeres de esta kaza, la vista se le enderecho ma malorozamente a la eskola no se fue.

A los dodje anyos, una demanyana en lavando, kanto el imno nasyonal fransez “ La Marseillaise” i todos kedaron enkantados de oyir su ermoza boz.

El padre ke oye ke su ija tyene ermoza boz de vista vino i la tomo de akea kaza. La entansyon del padre era, azerla kantar en las kayes i venderla a ombres.

Edith era buena de korason, pasensyoza i sansible ma nunka no dava su libertad, sovretodo a este padre kruel, de vista se fuyo de kaza kon su ermanastra Simonne nasida de otra madre i empesaron a asperar ombres en las kalejas de Pigalle, tomavan 150 frankos por kada seans.

A los 17 anyos paryo una ija, no saviya eya mezmo ken era el padre. Ma el kriyo mal mirado i neglijado paso menejit i muryo. Edith, para olvidar se dyo a bever i a kantar.

Una noche en kantando le oyo la boz Louis Leplee i kedo enkantado. El era menajer i teniya una sala de muzika muy konosida en Paris, la envito a kantar en su shena.

Por siguro kaliya topar un nombre para lansarla, Edith era minuda i flakita, komo la topo en un trotuar, sin pensar muncho, le metyo el titro “el pashariko de trotuares”.

De diya en diya la fama de Edith Piaf, empeso a pujar en Fransya. Un diya enkontro un ombre elegante i bueno. El era kazado ma eya se namoro, porke le estava dando muncha kerensya, estavan azyendo planos para el avenir. Edith, kon el, se sintia oroza porke estava ambyerta de kerensya, fin agora no se konfiyo i no kijo byen a dingunos. El era komersyante i viyajava por echo. Akea demanyana se bezaron i se abrasaron, el partyo por tres diyas a Londra. Dospues de doz oras vino haber ke el avion kayo i dingunos no salvaron.

Agora todos la konosiyan a Edith Piaf kon sus kantikas emosyonantes, yenas de amores i pasyones ma eya biviya kon el alkol kon drogas i kon morfina.

En un reportaje kon una revista, les disho a sus fanes:

“LO MAS EMPORTANTE EN LA VİDA ES AMAR İ SER AMADA, ES MUY PRESYOZO EL AMOR DE UN OMBRE A UNA MUJER, YO NO LO BİVİ MA LO SE MUY BYEN”.

Estas fueron sus palavras de alkavo.

Unos kuantos diyas dospues entro en koma i muryo en el anyo 1963 en Paris.

Edith Piaf, kuando muryo lo ke teniya 48 anyos. Su puerpo no era limpyo ma su korason muy puro, muryo sin kerensya i sin amor. La eglisya katolika no kijo azerle el funeral ma el puevlo se revolto.

El diya del funeral el trafik de Paris se paraliso, asisto mas de

100 000 personas EDİTH fue enterrada en el simiteryo Pere-Lachaise.