YERUSHALAYIM KAPITALA ETERNALA DEL PUEVLO DJUDYO
- 6 dakika önce
- 3 dakikada okunur
Poko diyas antes, kon muncho briyo se fiesto ‘el Dia Yerushalayim’ en Yerushalayim onde miles de sivdadinos kon bandieras en la mano estuvieron kaminando i kantando en las kayes prinsipalas de la sivdad, fiestando la reunifikasyon de eya ay 59 anyos. Oy Yerushalayim es i será la kapitala eternala de Israel onde serka de un milyon de sivdadinos biven, la mayoriya siendo djudiya.
No es muevo i será simpre diskutado las deklarasyones falsas echas a este sujeto por los dirijentes arabos en jeneral i por organizasyones sosyalas mundialas antisemitas ke niegan el atadijo istoriko del puevlo djudyo a esta sivdad 3 vezes santa. Eyos no respektan el atadijo istoriko de los djudyos a Yerushalayim i inyegan ke eya fue fundada por el rey David a ser la kapitala de su reynado, i mizmo afirman ke el templo, Beit Amikdash es un envento sionisto. Ademas insisten ke la sivdad fue okupada por Israel sin tener dingun derecho de proprieta. Ma la arkeolojiya prova el kontraryo onde grasyias a eya durante las kavakaduras se topo estampyas del reynado, dinero antiguo, eskritas ebraikas i mas otros objektos del tiempo del primer i del segundo Templo. Nyegar estos faktos es un revizyonizmo istoriko.
Ma los sloganes no son siempre faktos reeles i la propaganda no es la istorya. Los inimigos de Israel en repetando las mintiras les parese ke eyas serán konsideradas verdaderas, lo ke no es. Yerushalayim fue el sentro del spiritualizmo djudyo mas de 3000 anyos. El rey Salamon fraguo el primer Templo mas de 1500 anyos antes del invento del Islam. El sigundo templo egzistyo fin a su destruksyon por los Romanos en el siglo 70 de muestro era. Yerushalayim fue mensyonado mas de 660 vezes en la Biblia kuando ni una vez mensyonada en el Koran. Ademas la Inskripsyon de Siloam deskuvrida en el anyo 1880 prova ke durante el primer Templo, los djudyos durante la periyoda del rey Hezekiah fraguaron el túnel de agua lo ke prova sus egzistensyas i sus governansas de la sivdad.
Istorikamente se ve ke dinguna otra nasyon no deklaro kapitala Yerushalayim a la eksepsyon del puevlo djudyo. Ni los Romanos, ni los Bizantinos, ni los Otomanos ni mizmo los Inglezes i sovretodo los palestinianos izyeron de eya una kapitala. Serka durante 2000 anyos de egzilo i mizmo oy en dia los djudyos izyeron i azen sus orasyones 3 vezes al dia en direksyon de Yerushalayim, i repetan durante el seder de Pesah la dicha ‘al anyo vinidero en Yerushalayim’.
En la segunda partida del siglo 19 muncho mas antes ke el sionismo moderno politiko fue kreado i muncho mas antes del establesimiento de Israel los djudyos eran prezentes en grande kantidad en Yerushalayim. La povlasyon djudiya de la sivdad en el anyo 1876 era serka de 12 mil almas, i siempre pujando reprezentava la mayoriya de los moradores en el empesijo del siglo 20. Kon el establesimiento de Israel la povlasyon no manko de pujar i ansi Yerushalayim se arebivyo i se eskabuyo de su triste pasado de miles de anyos de okupasyon ajena, onde avia peryido su grandora i su ermozura.
No devemos de olvidar ke de 1948 asta 1967 la partrida vieja de la sivdad fue okupada por el Reynado Hashemito Jordanyano. Durante este peryedo los djudyos no solo peryeron sus moradas ma les fue defendido de vijitar el Kotel i el viejo baryo djudyo. Las tombas del Monte de Oliva fueron en parte destruyidas i utilizadas en la fragua de la kalejas i mizmo en las tualetas publikas.
Por kontra oy Yerushalayim refleta su vitalidad, es la sivdad la mas grande de Israel onde egziste 1000 sinagogas, sienas de eglisyas i duzenas de meshkitas. La Keneset (el parlamento), la Korta suprema, la Universita Ebraika i enkalkolavle de institusyones azen de eya una verdadera kapitala i no una relika antika de su pasado.
El Diya Yerushalayim no reprezenta un aniversaryo de una viktorya militar, ma es la selebrasyon de un viejo puevlo ke retorna a su tyerra istorika despues de siglos de esparzimyento. Yerushalayim no fue konkistada en 1967 eya fue liberada i rekuperada. Yerushalayim es la kapitala del puevlo djudyo porke la istorya lo deskrive ansi, la arkeolojiya i la demografiya lo konfirma ansi, 3000 anyos de memorya mo lo akodra ansi. Estos faktos ambezan a kualker ke kerera saver el amor del djudyo enverso Yerushalayim.
Dr.Selim Salti
Es ke meldatesh la eskrita de una semana antes?
Yorumlar