LOS SEFARADIM I EL SIONIZMO
- 25 dakika önce
- 3 dakikada okunur
La istorya mos ensenya ke los sefaradim izyeron sus aliya a la tyerra prometida siglos antes de la kreasyon de la ideolojiya sionista.
El sionizmo fue kreado komo se save por Theodor Herzl i un punyado de intelektuales djudyos evropeos a la fin del siglo 19, los kualos pretendieron ke los primeros olim eran los djudyos ashkenazim de la Evropa del este. Idea ke no parese djusta del todo.
El sionizmo sefaradí ampeso muncho mas antes del sionizmo propyo. Vino el tiempo ke el sefaradizmo aga una rektifikasyon en la istorya del sionizmo.
Por esto me refero a los livros eskritos a este sujeto por Aharon Mendola de Sola i de Ashley Perez los kualos dan a entender klaramente ke los djudyos sefaradís ladino avlantes se establesieron en la Palestina dezde del egzilo iberiko i mas despues durante el Imperio Otomano.
Sovre el enkorajamiento de Dona Gracia Nasi ke rekonstruyo la sivdad de Tiberiad, el establesimiento en kuantidad de los sefaradim en la Palestina Otomana asta el program proto-sionisto ke avia prezentado el Rabi Yehuda Alkalay prova ke el sionizmo no fue inventado en el siglo 19, porke ir a bivir en tyerra santa azia parte entera i konstante de la egizstensya djudya sefaradí ke su buto a traverso los siglos fue siempre de tornar a la tyerra de sus antepasados.
Ademas, Nahmanides i mas tadre Yehuda Halevi avian kon insistensya demandando a los sefaradim de vinir a establesirsen en la Palestina komo lo avia ordenado la Sinyora Nasi. Koza ke fue en partida realizada.
Sovre Perez el djudyo sefaradi siempre refuzo de azer la diferensya entre la orasyon i el dezeyo pratiko de establesirse en Sion.
Por esto siempre tuvo la volunta de ir a bivir en las tyerras de sus abuelos. Sion no fue i no es una aspirasyon liturjika ma al kontraryo una responsibilita biva en el pensamiento de kada miembro de esta komunidad.
Esta tradisyon se ve klaramente en personas selebres tal Sir Moses Monrefiore el kual fue un verdadero sionisto antes mizmo ke el biervo sionizmo fue inventado, el kual fue la persona ke supo tratar kon briyo kon las otoridades de Yerushalayim i ke reusho a a transledar la kreensa relijióza en realita, en ayudando los djudyos a establesersen en Sion, en fraguando moradas para eyos i para los futuros olim.
El efekto amontonado es bastante fuerte; basta de ver ke los intelektuales djudyos evropeos del siglo 19 en pensando a topar solusyones al antisemitizmo sosyo-ekonomiko krearon intelektualmente las fundasyones del sionizmo por lo mas empapados de las ideas de los filozofes i pensadores sefaradís.
En efekto, Perez klarifika en demonstrando ke el Rabi Alkalay establesyendo la aplikasyon praktika de su relijiozita en la aliya de los sefaradim, kreo una importante influensa sovre el nono de Herzl, el kual por seguro lo influenso a ke la idea de la kreasyon de un estado djudyo era la unika solusyon kontra el antisemitizmo.
Ademas Rabi Aharon Mendola de Sola en su livro da a entender ke antes Herzl i antes los kongresos de Basel i muncho mas antes ke el movimiento sionisto politiko sea un movimiento moderno, egzistiya una tradisyon sefaradi kon raizes profundos ke kombinava kreensya, pragmatizmo i una konsensia nasyonala.
Esta tradisyon fue markada por la relijyon djudiya ke kreo una konfiensa sovre el dekontino istoriko kontra la idea de ver el egzilo komo final. El mijor egzemplo fue i es la agada de pesah.
El sermon de Meldola de Sola no deve ser visto komo ser simple o komo una investigasyon akademika, el mos akodra ke la fundasyon intelektuala del sionizmo es muy ancha, profunda i diversa de lo ke parese.
Los sefaradís istorikamente avlando, siempre tuvieron la konfiensa en el Todo Poderozo ke un dia vendrá eyos tornaran a Sion kon su ayudo eternal, lo ke se realiza oy en diya.
Dr.Selim Salti
Es ke meldatesh la eskrita de una semana antes?
Yorumlar