ISRAEL SE DEFENDE EN LOS SIELOS
- 3 dakika önce
- 4 dakikada okunur
Israel se defende en los sielos grasias a su fuersza aéra una de las mejores en el mundo el kualo sistematikamente elimina los inimigos ke miran de atakarlo.
Durante los mezes pasados se vido su kapachedad de destruksyon sea en el Iran sea en el Libano sovre las sivdades, los sentros militares de los inimigos islamistos shiitos ke djuran la eliminasyon de Israel.
Ansi la supremasiya de Israel le permete de defenderse en un medyo inimigo onde se topa; koza ke a munchos en el mundo no les parese ser verdadero.
Sovre todo en las administrasyones ofisyalas evropeas ver i achetar ke los djudyos oy en diya son kapaches de defendersen sin demandar ayudo, los enkantan.
Mos akodramos kon muncha tristeza los momentos embarasados de la Sigunda Gerra Mondiala kuando en el anyo 1944 los djudyos amerikanos i inglezes se avian adresado a Franklin D. Roosevelt i Winston Churchill para demandarles una misyon de bombardeamiento de la linya del shemendefer ke iva a Auschwitz i ansi salvar los djudyos ongarezos de la muerte.
Demanda piadoza ke no fue echa. Mos akodramos kon muncha tristeza i kon amargura de akeyos anyos de no poder defendermos de mozotros para mozotros.
Ay 20 anyos de la vijita simbolika de los aviones israelianos en los sielos de los kampos de orores de Polonya onde los pilotes prometieron ser los guardyanos del puevlo djudyo i de su nasyon israeliana, ke sin falta la kumplieron anyos despues kon los atakos sovre el Iran, el Lebano i el Yemen ke luchan a destruyir Israel.
Un tiempo el sielo era silensyozo en el Medyo Oriente ma el no sera mas del todo vakante visto ke la fuersa aera israeliana lo dominara por siempre.
Theodor Herzl i los primeros sionistos fueron terrorizados de la persistensya del antisemitizmo en Evropa. Los djudyos en los siglos 19 i 20 se emansiparon i se adaptaron en azyendosen miembros de la alta sosiedad evropea.
Eyos partisiparon aktivamente al kresimiento i al dezvelopamiento de la kultura, de la sensya, de la teknolojia, de la politika i del komersio en el kontinente.
Malgrado esto el odio kontinuo tomando diferentes formas en diferentes payizes, ke finalmente en todos los lugares del kontinente el mizmo denominator de inimista pujo al lugar de amenguarse.
Para Herzl la solusyon era simple, eliminar la kavza de la inimista. Por modo de esto el avanso ke los djudyos devian egzilarsen de los payizes antisemitos en fraguando su estado sovereno.
El pretendyo ke no siendo mas musafires en los payizes en los kualos biven, el antisemitizmo seva desavorado por los otoktones.
En biviendo en kondisyones de musafir en tyerra ke no es la suya el djidyo kreyo sospecho i inimista, en eliminando estas kondisyones, el pensó ke el antisemitizmo va desapareser.
El pretendyo ke en este kavzo los djudyos tendran una vida normal entre las nasyones. Malorozomante el se yerro, el establesimiento de Israel no elimino el antisemitizmo ma troko su facha. La inimista perduro i a kada oportunidad permete a ke eya se arrebiva kontra el puevlo del D. El antisemitizmo aparese tichido en la tela de la umanidad.
En las jenerasyones aktualas se izieron munchos esforsos para luchar kontra el fenómeno del antisemitizmo en establesiendo diálogos entre las komunidades, kreando muzeos sovre la Shoa i la tolerensya i leyes votadas en munchos payizes del oksidente ke permetyeron a limitar a bastansa su dezvelopamiento.
Ma todos estos esforsos no parvinieron a su resureksyon aktuala kon model de la vieja animista. El lenguaje troko ma la struktura kedo siempre la mizma i ke no savemos malorozamente kuando desaparesera de la istorya.
Ay un siglo ke los djudyos fueron akuzados por los komunistos de ser responsavles del kapitalizmo global, mientres los kapitalistos fueron konvensidos ke eyos ayudaron al dezvelopamiento del komunizmo revolusyonaryo, ansi kreando sin renderse kuento entre eyos una alianza antisemita.
Oy se ve otro djenero de alianza. Los iperprogresistos de la siedra del mundo sivilizado por lo mas korruptos akuzan Israel de maltrato, de okupasyon de territoryos, de apartheid i de imperyalizmo.
Ademas los sirkolos de la derecha arebiven akuzasyones viejas sovre los djudyos komo el kontrol de la ekonomiya i de la politika de las grandes potensias en ajisando kon kayades detrás las shenas, a los kualos se adjuntan los islamistos fundemantalistos i sus simpatizanos.
Estranyo, esta alianza parese diskordante ma malorozamente ma no es, basta de meldar la istorya aktuala djudiya.
Aktualmente la narrativa antisemita fraguada de manera falsa justifika la inimista i mizmo el asasinato. El diskorso en los medyos antisemitos yeno de mintiras troka la realidad, lo ke kon tiempo a fuerza de repetarlo se familiariza en el meoyo de la kaye inyorente i se aze kredivle.
Difisil de luchar kontra estas mintiras ke mos kavza muncho mal. Ma Israel es bastante fuerte malgrado la situasyon dezagradavle i tanto ke el militarmente, ekonomikamente i sosyalmente progresa i keda unido poko le importa lo ke los antisemitos dizen i ovran.
Oy Israel en los sielos anunsya un muevo ayre de dominasyon en el Medyo Oriente.
Dr.Selim Salti
Es ke meldatesh la eskrita de una semana antes?
Yorumlar