SOVRE LA KAZA - PARTE:3

Keridos lektores, komo ya puedesh ver las dichas i refranes sovre la kaza son bastante rikos… tanto ke oy ya es la tresera parte le esto kompartiendo kon vosotros…

Komo dize el refran, la kaza es un pozo ke no tiene fondo/dip… tanbien son sus refranes… ☺

• Mas vale buen amigo en la plasa ke moneda en la kasha /en kaza.

• Mas vale /save el azno en su almena (tr:ahır) ke el savyo en kaza ajena.

• Mi vinya entre las vinyas, i mi kaza entre buenos vizinos. (la importansa de tener buenos vizinos)

• Ninguno ke no manke de su kaza.

• Ni oya deskuvierta, ni kaza sin puerta. (No deskuvres a ajenos lo de tu kaza.)

• No kites de kaza tu kamiza suzya. (guadra-te de kontar lo tuyo a ajenos)

• Pan en kaza, agua en el rio; saver no kere este ijo mio.

• Para el ladron de kaza no ay remedio. ( no se puede prevenir kuando el ladron es de kaza.)

• Por mankansa de una ventana no se siega la kaza entera.

• Si en kaza no ay amor ke tura, nunka tiendran vida segura.

• Si no tienes viejo en kaza, merkate lo.

• Si pas /pan en kaza manka, el chorro de amor manka.

• Umo, tejado ke korre i mujer mala kitan al ombre de su kaza.

• Una senteya munchas kazas kema.

• Vieja/Viejo en kaza, allegriya en kaza.

I agora unas kuantas dichas:

• Topo kaza, meza, almenara I mujer en la kama (ombre mazalozo)

• Afuera de kaza - leshos de mozotros.

• Alevantar la kaza – meter todo de boka abasho.

• Dar la kaza a kemar – azer grande yerro.

• De tu kaza ke no mankes.

• Ke no dezeyas la kaza de tu padre – ke seygas orosa en kazamiento.

• Echarse la kaza al ombro. (Enkargarse la resbonsabilitad…)

• El balabay de kaza ke no manke.

• En tu kaza ke te lo veyas!

• Kaza es, ke se tope.

• Kaza es, todo se kere.

• Kaza halavro (kaza muy grande i sin orden)

• Kazika de Moshe Rabenu (kaza ande ay muncha djente I ande vienen munchos musafires)

• Kemar la kaza por una pulga.

• Kemar la kaza para eskapar de las chinchas.

• Ke no mos manke la kavesera de la kaza. (el padre, el marido)

• Estar la kaza en tavlas ( kaza vaziya i medya derrokada)

• La kaza esta novya ( limpya i ermoza)

• Mi kaza es tu kaza. (sos bienvenido)

• Mirar la kaza. (alimpiyar i enderechar)

• Tomar mujer del banyo a kaza (sin dota ni ashugar.)

• Topar la kaza kemada I los ijos karvon (situasyon katastrofika)

• Vinir de buena kaza (de buena famiya).

Ansi terminamos las tres serias sovre la kaza. Espero ke vos gusto I ke tomatej plazer de meldar…

En la proxima ves, mos akodraremos dichas i refranos sovre kazar i el kazamiento.

A vermos!!

Yazarın tüm yazıları için tıklayınız