top of page

Sovre La Fiesta de las Madres (2)





Muestros ijos i ijas son el fruto de tantas noches largas sin durmir, vijilando i inkietandomos.. Eyos son el fruto de muestros sakrifisyos para ver sus suksesos i felisidades.. Eyos son el fruto de los kaveyos blankeyados en muestra kavesa i de las rugas profundas en muestra frente. Mos merikiyamos kon eyos, yoramos en sus tristesas i riyimos en sus allegrias..



Pasan los anyos i se engrandesen i los rolos trokan. De bebe, devienen kreatura, mansevo, adulto… Entre kada episoda de sus vidas lo ke no troka es muestro instinkto de posesyon i de proteksyon: “İjo miyo, mira ke konduizes kon atansyon, ke no akselerez muncho..” o “İja miya, vistete bueno, ke no te yeles..” son palabras ke no eskapamos de dizir durante anyos..



Ma kon los anyos pasandos, eyos devienen adultos, ganan una profesyon, se kazan etc.. Agora son eyos ke mos dan konsejos i rekomandasyones. Son eyos ke mos dizen: “Mama, vistete bueno, no neglijes de ir al doktor”, o “Papa, aze atansyon en konduizando.., no neglijes de tomar tus kuras..” İ mozotros, los sintimos kon prudensya, azemos lo ke mos dizen i no tomamos dinguna desizyon importante sin konsultarlos.



Ansi es ke empsamos la vida siendo los ijos i ijas de muestros padres i madres, mas tarde somos los padres i madres de muestros ijos, i al final, devinimos los ijos de muestros ijos!..


Dizen ke ser padre i madre es un arte, una profesyon... Una profesyon de amor i amistad ke no tiene ni pensiya, ni vakansia... ma tiene un grande premio i una gratifikasyon.


Esta gratifikasyon viene en los anyos ayedados i vos se da en los brasos kon todo el amor i la satisfaksyon de tener “inyetos”.


I ansi es ke mos sintimos de muevo mansevas, kon la emosyon de tener en los brasoz el fruto de muestro fruto, de bivir de muevo este amor inkreible i tener la satisfaksyon de ver a muestras ijas sintir a sus tornos, este amor maternal.


Komo dishimos mas antes, la edukasion de la kreyatura es en si un pozo de kontradiksyonez. Kerej un egzempyo?..: Durante los dos o tres primeros anyos de sus egzistensya penamos para ambezar a muestros ijos a kaminar i a avlar, i despues, en los anyos vinideros les dizimos de estarsen kedos i kayados..



Otra kontradiksyon : En Israel, demandaron a una kreyatura de sinko anyos lo ke pensava por la eskuela maternal, i ansi respondyo : “Es una eskuela ande ambezan a los ke aharvan a no aharvar, i a los ke no aharvan, les ambezan a aharvar !”.



Avlando de eskuela i de edukasyon, i para meter el punto final :,


Una mujer bien vistida i elegante, teniendo en la mano un rulo, entra kon eksitasyon i ajitasyon en una butika de kuadros ( çerçeveci) i le dize :


-“Mira ver a azer grande atansyon i kudiado porke este rulo ke tienes ke enkuadrar es una koza terriblamente presyoza.. Esto ke ves, me kosto justo 150 mil dolares!”


-Oy, madam”, le respondyo el patron de la butika, “Kualo es? Un Picasso? Un Van Gogh? O un Dali ?.. En tantos anyos de profesyon no me tiene kayido en la mano una koza de tanta valor.. yo no tengo koraje mizmo de tokarlo !”


-“Bueno, bueno, no t’espantes, no es ni Van Gogh ni Picasso” le respondyo la mujer, avriendo el rulo, “esto es el diploma de universita de mi ija !”


Madres o ijas, vos oguro a todas de siempre ser madres allegras i kontentes.





Bình luận


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page