SOVRE EL KAZAR – EL KAZAMIENTO

Djusto komo la kaza, i el kazamiento tiene un grande lugar en las dichas i los refranes en la lingua de muestros antepasados. Siertos lo alavan, ma munchos paresen ser kontra o se burlan. Komo :

*Antes ke te kazes, mira lo ke azes. O “Ande ay kazar, ay kagar” .

Agora empesaremos a konoser unos kuantos de los mas enteresantes.

• La muchacha, antes de kazar tiene siete brasos i una boka; despues de kazar siete bokas i un braso. (se aze haragana i avla muncho)

• Azeitunas en bivda, azeitunas en kazada. (Se dize por una bivda ke no topo repozo materialmente en su segundo kazamiento)

• De en diya en diya kaza mi tiya / Kaza Maria. ( se dize para kozas o echos siempre deshados para mas despues.)

• Coha, antes de kazar merko la kuna. (Despasensiozo…)

• El dia ke me kazi, kon buena kavena me ati.

• El kazamiento es una komida tapada (no se ve lo ke ay dentro)

• El kazamiento es un lugar serrado. Los de afuera keren entrar, los de ariento keren salir.

• El kazamiento es koza sakra, es para la vida entera. (divorsar no era muy akseptable en tiempos pasados)

• Dulse vida pasan los kazados, si son fidel i amados.

• El Papaz no se kaza, de pedasikos se pasa. (satirismo )

• Ija de Judyo no keda sin kazar. (kada ija topa su mazal)

• Ija de kazar, fierro de mashkar. (koza difisil)

• Ija de kazar, nave de enkargar. ‘’ ‘’

• Ija kazada, siyen novyos a la puerta. ( despues ke ya se kazo, le viene munchas buenas propozisyones )

• Kazamiento de proves, fabrika de limoneros i de sedakeros. ( los ijos de proves seran tambien proves)

• Kazar es un regalo, parir es un mal ke paso, kriar es mal de todo el anyo.

• Kazar i arrepintir, por el mizmo kamino los veyo vinir.

• Kazar por los bienes es tomar karga en reines. (es eskontrar sekaturas).

• Ken kaza por la moneda, la moneda se va, la mursa le keda.

• Kazate i veras, al anyo me lo diras.

• Kazo la tuerta, metyo el mundo en rebuelta.

• Ken kaza i fragua, el Dio le apiyada.

• Ken es la buena kazada ? La ke no tiene ni esfuegra ni kunyada.

I agora para terminar por esta ves, un refran ke me plaze i me aze siempre reir:

• Ken se kaza kon viejo, toma el tchukal por espejo.

Keridos lektores, tenemos mas munchas dichas i refranes savrosas sovre este mizmo sujeto. Si vos gustara, kero kontinuar para la ves ke viene.

Al vermos.

Yazarın tüm yazıları için tıklayınız