SHEKEL FLAKO

(Teksto-Audio)

2023 va ser una anyada de tranzisyon onde el shekel kedara flako kontra el dólar, la mayoriya de los ekonomistos de las grandes bankas mondialas ke se interesan a Israel, en estos días, lo deklararon. El shekel perye oy 4% verso el dólar amerikano lo ke kavza ke los produktos de primera urjensa importados del estranjero se azen mas karos, koza ke influensa los budjetos de las famiyas proves del payis.

La inflasyon mondiala de 2022 i sus konsikuensas sovre la ekonomiya Israeliana fue bastante grande, para poder amortisar el shok, la Banka de Israel fue forsada de pujar los interesos de baza (prim) de 1.25% a 4.75% afin de mirar de atakanarla. Mizmo reaksyon se vido en Los Estados Unidos onde los interesos de baza pujaron a 5.5 % i 3.75% en la Unyon Evropea. La segunda mas grande ekonomiya mondiala, la China en el sigundo trimestro de esta anyo impeso a retablisirse i a poder operar su industriya en partida arestada kaji durante todo el anyo 2022. Ansi se pensa ke verso el empesijo de 2024, eya será kapache de solvar la problematika de los dezovreros.

De otro lado la Evropa en 2022 se topo en gerra, en estrechura de armamento de defensia lo ke le kosta miliardas para enforteserla. Ademas la enerjiya le reviene bastantamente kara visto la situasyon kon la Rusia. Estos son unos kuantos faktos ke pujan la inflasyon en el mundo i poedo afirmar ke despues del kovid el mundo se kristalizo en un entorno jeneral de pujita de interesos. Israel de este punto de vista esta en mijor situasyon, visto ke la alta teknolijiya i la industriya lavoran regularamente i son demandadoras de personal. Mizmo los ospitales están en mankura de doktores. El dezempleo (Shomaj) en este payis a mi avizo no egziste.

Dire ke la floshura del shekel es kavzada por razones puramente ekonomikas i no por razones politikas komo fue deklaro en la prensa i en las televizyones. De mi perspektiva personal no es djusto de akuzar el governo elejido si el payis esta enfrente de una karestiya diktada por la inflasyon mondiala. Es justo de tomar prekosyones, ke pensó ke ya fueron tomadas por el viejo governo, oy en opozisyon i por el aktual. No seremos alarmantes en pensando ke la inflasyon aktuala del payis es la konsikuensa de una mala administrasyon, ma devemos entender ke eya proviene de un fenomen mundial ke no se puede kontrolar desde un chiko payis komo Israel. La kriza sovre el sistema judisaryo es grave i una partida del publiko laiko no kere ke la derecha en poder lo troke. La djente en las kayes de Tel Aviv manifestan todas las semanas pretendiendo ke la demokrasiya seva desfuersarse. No se si tienen razón o si sus butos es de mirar de azer kayer el governo aktual. Politikamente oy, en todas las partes del mundo oksidental se ve polerizasyones, ke mos parese, ke en Fransya, en Los Estados Unidos, en la Alemanya, en la Ingleterra no ay protestos?

Las kompaniyas israelianas son azlahaliyas i están produzyendo kon sukseso sus produktos sin konsiderar kon seryozita la politika del payis. Israel oy esta en un alto nivel de teknolojiya i en un alto lugar en la ekonomiya mondiala. El es el sentro inkubator de la teknolojiya avansada i su ekonomiya fuerte la ayudara a eskabuyirse en serka de la inflasyon. Pasensya se kere sin duvda, ma no pensó ke el puevlo israeliano va sufrir muncho tiempo de la inflasyon. Viniendo al shekel el se enfuertesara de muevo una ves ke la inflasyon se amenguara i ke los interessos de prestimo abasharan a un nivel suportavle. Oy los enteressos sean en Los Estados Unidos sean en el resto del mundo están altos i se aspera ke sus majia abastesera a arestar la progresyon de la inflasyon. Para konkluir dire ke verso el empesijo de 2025 el shekel se pode de muevo inforteser i no mos enkantaremos si resivimos kontra un dólar 3 shekeles i mezmo menos.

101 Kuentos Modernos de Djoha-Dr. SELİM YEHOSHUA SALTİ

Buy Now

Apretar al boton para ver todos los eskritos