Munchas amigas me demandan deke no me vo kada dia a djuguar kartas.
“A los ijos ya los kazates, ke topas de azer, no te enfasyas de estar sola?”
No! no me enfasyo. Tengo una ideolojiya
“MAS VALE SOLA KE MAL AKOMPANYADA”.
Esto no kere dizir las amigas ke djugan kada diya me akonpanyan mal, djugar kada diya no es una vida para mi, ya me abasta unas doz vezes a la semana, mos vemos, bevemos kaviko, azemos un poko dedikodu pasa el diya.
Ya tengo reuniones de ovras, si ay u un teatro prefero mas. Si algunos diyas esto en kaza tomo papel i el kalem en la mano eskrivo lo ke me vyene al tino, en supito miro ke se izo un senaryo. Adapto kantikas turkas al ladino i por siguro meldo livro, tengo yugo de eskrivir a las revistas Şalom a El Amaneser i agora a IYT.
Un agradesimyento a los ke meldan los artikolos ke eskrivo i me onoran en dizyendome:
“Forti me plazyo muncho lo ke eskrivites”
“Me pishi de la riza en meldando”
“Eskrivites lo ke tengo aryento el korason”
Los keridos lektores me enaltesen i me dizen no deshes de eskrivir tyenes un estilisto muy ermozo.
Esto me motiva i la verda dizir a ken no plaze agradeser.
Kreyo ke apresyash ke no es muy fasil de topar sujetos. Kuando ya vyene el diya de eskrivir me asento i empeso a pensar. Del dyo ke tengo una observasyon (kual ke no fuera porke de ves en kuando observo i lo ke no es menester) ma atorgare ke munchas kozas me vyenen fin al pye i syempre bendigo a mi puevlo. Tanto ke mi puevlo bive yo en primero el dyo no kedo sin sujetos.
Ya savesh ke empeso la sigunda sezon de la seriya “KULÜP” en NETFLİX.
Veramente muy reushida seya el sujeto seya la muzika, los kostumes los peynados todo muy ermozo. Komo la tema era la vida reel de una mujer djudiya, a mozos los djudyos mos entereso mas muncho. Sovretodo ke munchos djugadores de la komunidad djudiya tomaron parte en los rolos de figurantes, fue un orgulyo para mozos.
Yo supito me topi en un mundo ke no konosko. Telefones i telefones de periodistas de jurnales, de televizyones, mezmo del etranjero, todos kuryozos mas del filmo ke de los sefarades, de las tradisyones, mas muncho del ladino.
Ay anyos seya en el sentro sefaradi seya en el “ladino day” ke penamos para darmos a konoser para lansar el ladino, kon un filmo en una noche mos konosyeron i kedaron kuryozos de lo ke no saviyan. No les echo kulpa porke munchos anyos no anyos syeklos i syeklos bivimos un poko sekretos, kon espanto i no mos dimos a konoser. En fin kijo dizir ke agora vino la ora.
Por siguro ke todas mis amigas me felisitaron por tomar parte de konsultorya i djugadera en una seriya profesyonal.
Yo emprimero el echo no lo tomi muy seryozo kuando me demandaron ayuda solo por el ladino no puediya saver ke lo ke ize, iva ser tanto emportante.
Una demanyana me sono el telefon, miri un numero ke no konosko, de uzansa no avro el telefon si no esta anrejistrado el nombre, porke se esta oyendo muncho negro ma komo tomi telefones de personas emportantes avri. Dainda sin dizir alo, sin demandarme si esto dispuesta una damma se dyo a konoser i empeso a alavarme:
- Mira ke estavas una lokura djugates maraviya (lo ke me vido un segondo)
- Mer…
- Tu nasites artista
- Yok canim...
- Mesto glorifikando de tener una amiga komati
- Mersi muncho
- Te kero muncho byen
- Esto en la kaye kuando vengo a kaza te bushkare?
-Mira Forti si lo van a djugar otruna sezon ke me yeves i a mi
- Yo no so direktora de casting hanum
- Ayde a ti ya te pasa la palavra
- No es komo pensas
-Ayde un alay de konosidas vide i yo kero
- Yo… no….
- Sos hanuma ya me yevas no?
Las luzes de la hanukiya ke vos yeve a la pas syempre alegres HAG HANUKA SAMEAH.