MADAM FİLİBA

En los roles ke djugi en estos 35 anyos, entri en munchos karakteres, seya komedya seya trajedya seya drama. Atorgare, lo mas ke tomi plazer fue roles de istoryas de vidas reel i de mujeres korajozas. Komo Sarah Bernhard, komo Donna Gracia Nasi, Golda Meir, İrena Sendler etc. En djuguando sus vidas kedi kuryoza komo una mujer puede parvinir a fondar un teatro, komo una mujer puede fondar un pais i otra puede salvar 2500 kriaturas de los kampos de konsantrasyon en no syendo djudia. Ma el proverbo dize:

“Kuando una mujer se mete a la kavesa una idea, mijor es kortarle la kavesa ke kitarle la idea .”

Agora vos va avlar de una mujer no solo korajoza de una mujer ke da luz, ke informa i aklara munchas mujeres kon su saverisyo, kon su sensya kon sus egzemplos, kurto una biblioteka biva, kreyo munchos Turkanos ke izyeron aliya a Erets İsrael la konosen,

SİLVA FİLİBA (MADAM FİLİBA)

Munchos anyos antes tuve el onor de ser su vizina i fui testigo de verla kada diya, luvya, inyeve, friyo, kalor indose a partajar su sensya kon grande plazer i pasensya. No ay ken no la admire. Una de eyas es mi ermana Çela ke la admira i partaja sus eskritas maraviyozas.

En pasadas me vino al mesaje unas de sus eskritas en turko, tanto me plazyo las traduizi i kon su permisyon las va partajar en resumen.

TU BİSHVAT

Oy en diya la umanidad sesta machukando por los problemes ekolojikos. Puedemos entender de la Tora, eskrito antes 33 syeklos, komo mozos las personas destruimos la natura por no aplıkar las reglas.

Deskansar la tyera, protejar las verduras i los arvoles es un dover ma mozos ensuzyimos las mares en echando syerkol, konsumimos las plantas i los animales i rovimos la erensya de muestros desendeyentes.

TU BİSHVAT mos da un mesaje muy espesyal.

Los arvoles no se plantan solo en la tyerra se plantan tanbyen en muestra alma. Por esto kale sembrar en los puerpos i almas de los ijos las plantas de la tora, esta manera kuando estan leshos de sus famiyas, mezmo en todas difikultades, estas plantas se van a enfloreser i va kreser arvolikos de tradisyones. Esta manera vamos a kultivar muestra garantiya i esta manera kontinuara muestra egzistensya.

EL MEZ DE ADAR

El 7 del mez de Adar es el diya de

“Rekuerdo de los soldados deskonosidos”

En esta data se aze orasyones i seremoniyas komemorativas en sinagogas i simiteryos militares.

Sigun muestros rabinos el 7 adar es la muerte de Moshe Rabenu ke no se save el luguar de su tomba, esto lo meldamos en el livro Devarim en la perasha de alkavo. Dyo le mostra de leshos las tyerras santas ke no vido nunka, los montes de inyeve de Hermon, las verduras de Galile i la ermozura de Hebron. Un diya dospues su puevlo, kon el giador Yeshua salyeron a kamino i empeso el viaje de konkista a las tyerras prometidas.

33 syeklos paso, Moshe Rabenu syempre kamina delantre de mozotros. Kada vez ke alevantamos el sefertora i dizimos “zot a tora” moshe esta delantre de mozos i esta kontinuando a mostrarmos el kamino de luz de la Tora.

SİLVA FİLİBA ke bivas munchos anyos kon sanedad, syempre ke mos alelumbres kon tu luz.

TU BİSHVAT SAMEAH.

Apretar al boton para ver todos los eskritos