Ludwig Guttman - Fundador de los djugos paraolimpikos

Este anyo, los djugos de paraolimpikos se izieron en Tokyo entre el 24 de Ogusto i el 5 de Septembre. El anyo ke pasimos no se aviyan echo por modo del Covid. Kuatro mil i kuatrosientos atletes partisiparon a los djugos.

En el anyo 1917, Ludwig Guttman, un mansevo judio alman, voluntario en el ospital de aksidentes, rankontro un hazino ke se aviya rompido la espalda. Los doktores no teniyan remedios para kurarlo, i lo desharon a la muerte. Guttman nunka pudo olvidarse de este evento. Esta memoria troko la istoria.

Anyos despues, Guttman se izo doktor, i se espesializo enriva la kolon vertebral. En la segunda gerra mondial, Guttman se fuyo a la Ingletiera kon su famiya. Kon tiempo, fondo una kompetision para los diskapasitados, i ansi, Ludwig Guttman fue el padre de los djugos paraolimpikos.

Stroke Mandeville es el nombre del ospital en el norte de Londra, ande Guttman fondo una unita para los invalidos de la segunda gerra mondial.

Ay una grande ironia en este evento - Hitler kijo matar a todos los djudios, i los diskapasitados, dunke Guttman fondo una unita en el ospital Stroke Mandeville, para sanarlos.

En el anyo 1933, antes ke se fuyga a la Ingletiera, Guttman estava lavorando komo neuroshirurjiano en el ospital Breslau. Ma, en el anyo 1939, lo transferaron al ospital judio lokal, porke los nazis aviyan metido una ley, diziendo ke los doktores judios ne pueden lavorar en otros ospitales.

En la noche de Kristallnacht, Guttman aksepto sesenta personas al ospital, afirmando ke son hazinos. Ma, kuando la Gestapo se apersivio, el Konsey de Asistensia de los Refujiados Akademikos lo fuyo a la Ingletiera kon su mujer i sus dos ijos.

En la Ingletiera, en la sivdad de la Universidad Oxford, el governo obzervo un artikolo ke Guttman aviya eskrito sovre los diskapasitados. Komo los inglezes estavan asperando munchos veteranos ke ivan a tornar de la gerra, se desidaron de avrir una unita espesial por la kolon vertebral en el ospital Stroke Mandeville.

Ludwig Guttman se okupo tambien de la salud mental de estos hazinos. Guttman penso ke para ke estos hazinos se agan buenos, kale ke keran bivir, i para kerer bivir, kale tener un buto en la vida.

Esta idea lo izo empesar los djugos paraolimpikos. Los primeros djugos empeso en Londra, en el anyo 1948. En el ospital Stroke Mandeville, Guttman organizo una kompetision por diziocho hazinos. Esta kompetision se repeto kada anyo. En el anyo 1952, los djugos se izieron internasional, i en el anyo 1960, los paraolimpikos empesaron a azersen en el mezmo lugar de los olimpikos.

Yazarın tüm yazıları için tıklayınız