LO KE ESPERAN LOS ISRAELIANOS
- Dr.Selim SALTİ
- 1 gün önce
- 4 dakikada okunur
Semana muy importante por el futuro del Medyo Oriente durante la vijitai i las diskusyones sovre las dechizyones politikas ke se toman en la Kaza Blanka entre Benjamen Netanyahu i su kolega politiko el Prezidente Donald Trump endjuntos kon sus ekipos. No ay duvda ke Los Estados Unidos i Israel durante la gerra kontra el Iran provaron al mundo entero ke son unidos para la defensya de la demokrasiya del puro islamizmo fundamental el kual mira de derokarlo. Israel provo ke es invensivle kuando se trata de su egzistensya. Repeto la mizma aksyon de la gerra de ‘Los 6 Diyas’ kon la kuala destruyo las armadas arabas, en atakando durante 12 diyas las instalasyones de produksyon del uranium i eliminando la krema de los dirijentes del estado i de los responsavles del proyekto atomiko en el Iran.
La armada Israeliana enganyo a los iranyanos de la manera ke enganyo a los sirianos, los ejipsiyanos i los jordanyanos ay 58 anyos, kon sopreza i kon muncha abilita en destruyendo todos los sistemas de defensya ke teniyan i ovrar durante12 diyas a meter la Republika Islamista en estado de perdisyon. Grasias a su superyorita taktika la fuerza aeronotika israeliana atako dia i noche el inimigo sin peryer mizmo uno de sus aviones.
Netanyahu todo en siendo kritikado en su payiz i en las kapitalas evropeyas por su manera de tener una politika radikalista esta vez merese ser onorado despues la desfecha del Iran i de sus proksis. Munchos pensan ke su eroizmo istoriko le dará la fuerza de pueder forsar a los vizinos arabos de pagar sus devdas a Israel por aver aflakado el inimigo komun el Iran en lo rekonosiendo de yure. Los Estados Unidos devran ser kontentes de tener en el Medyo Oriente un aliado fuerte tal ke Israel i se espera ke malgrado las ezitasyones de la Arabia Seudita de adjuntarse a los Akordos de Avraam, ke purfiara kon determinasyon a konverser sus dirijentes de no asperar muncho mas para azer la pas kon Israel. Se aspera de mezmo de Los Estados Unidos a ke agan presyon sovre el Libanon i la Siria a adjuntarsan a este akordo malgrado ke la Turkiya mete entrompresos. La Turkiya keryendo los aviones F-35 ke le fueron refuzados, mira de obtenerlos de los Estados Unidos kontra su akordo de ovligar al-Sharaa de azer la pas kon Israel.
Ma lo mas importante para el puevlo israeliano es de rekuperar los 50 arevatados ke estan dainda en la mano del Hamas, el kual no parese vensido malgrado la okupasyon del 75 % de la banda de Gaza. Si Israel avia achetado al prensipyo a deshar el Hamas en su lugar no ay duvda ke dezde muncho tiempo los arevatados avian sido liberados. Ma una minoridad en Israel tomando el risko de peryerlos salieron kontra la idea de deshar el Hamas en poder i purfia dainda a ke la gerra kontinue. Ma despues de 21 mez de matansinas ke mos kosto miles de vidas djudias i de la destruksyon kaji kompleta de la banda de Gaza vino la ora de dizir basta a este pleto ke no se eskapara sin azer konsesyones sovre el futuro de la povlasyon palestiniana malgrado ke se pensa ke el Hamas desfuersado tiendra en partida el kontrol de la banda.
La derecha ekstremista de la koalisyon del governo de Netanyahu kere ke Gaza sea okupado definitivamente por Tsahal (Armada Israeliana) i ke los otoktones sean forsados de una manera o otra al egzilo en establisiento muevas koloniyas djudiyas. Koza ke es imposivle a akumplir en las sirkonstansyas aktualas sea al seno de la sosiedad israeliana komo a las del mundo libero. Se espera ke Donald Trump en konvensyendo a Netanyahu a ke la trega sea achetada por las 2 partidas de mirar kitar avantajes de esta mueva situasyon en ovligando los payizes arabos de azer en primero la paz kon Israel i de okuparse despues a dezvelopar la vida de la banda de Gaza en investisyendo materialmente afin de estableser una direksyon palestiniana ke achetara de estar en buenas relasyones kon Israel. Esto será, lo pensó, el kamino ke se deve segir.
Una vez los arevatados salvados Israel i los Estados Unidos devran de mirar sin falta a renovelar la Otoridad Palestiniana kon muevos dirijentes votados por el puevlo ke se okuparan de la direksyon de Gaza. La Otoridad ke kolabora kon Israel, una vez reformada devra ser ayudada por la Liga Araba en demandando de sus miembros de ser prezentes en la administrasyon de Gaza en mizmo tiempo de los delegados de las potensyas oksidentalas. Ansi arezyar la parte sud de Israel de kualker futuro atako.
Sin muncho tener konfiyensa en las promezas de los dirijentes del Hamas, poko antes eyos deklararon ser dakordo a deshar la direksyon de la banda de Gaza i eventualmente de achetar a egzilarsen. En kavzo de insistensya del Hamas de kontinuar a kerer guadrar las armas i dirijar la banda, eya será kompletamente izolada sin poder ser fraguada de muevo. Esta situasyon kavzara ke miles de gazaouis keraran fuyir lo ke amenguara de manera seryoza la povlasyon. Ma al kontraryo komo lo disheron si los del Hamas deshan las armas se pensa ke 100 miliardas de dólares se gastaran para rekonstruir la banda. Los payizes rikos arabos del Golfo endjuntos kon la Arabia Seudita investirán el dinero nesesaryo, lo ke demostrara al mundo entero el model de jenerozita i de ermandad entre los arabos kuando el djihatizmo es vensido. Es esto lo ke los israelinos esperan.
Por el Dr. Selim Salti
Es ke meldatesh la eskrita de una semana antes?
Comments