MENOSPRESYO DEL DJUDYO
- Dr.Selim SALTİ
- 10 saat önce
- 3 dakikada okunur
Politikos, djente de kultura i mizmo simples sivdadinos en el oksidente sin ser nombrozos, kalifikan Israel komo una paria global, los djudyos de la Diaspora debasho de un blokeo de menospresyon i la demokrasiya israeliana estando enkolgada en un ilo delgado, pronto para romperse. Esta situasyon alarmante no es mueva i no ampeso despues del 7 Oktobre 2023, si no ke dezde munchos anyos antes. La inimista es muncho mas vieja del akontesimiento de los evenemientos del 7 Okrobre lo ke enkorajo selebrasyones en las kapitalas prinsipalas del mundo oksidental. Una manera de dar suporto al terror sovre las matansinas, los kemados bivos o degoyados en sus propyas moradas. No fueron manifestasyones de regreto ni de apoyo a los djudyos, ma al kontraryo kon los sinyales ‘Palestina Libera’, las bandieras palestinianas i los sloganes ‘del riyo fina la mar’ fue dar razón a Hamas el terroristo. Si esto no es dar suporto al terror kualo es mos demandamos? Sozde ayudar el establisemiento de una entitad palestiniana en Yehuda i Shomron?
Ver la realita de los faktos siendo akararse la ideolojiya danjoroza ‘kolorada-vedre’, en jeneral a munchos anti-Israelianos les impide de dar razón a los djudyos ke defenden el uniko estado djudyo. Esta alianza es el adjuntamyento radikalo de la siedra internasyonala (kolorada) kon la ideolojia islamista (vedre) ke mira en jeneral de desestabilizar la demokrasiya oksidentala i de destruyir Israel. Mira la koensidensya ke estas 2 kolores son las kolores de la bandyera palestiniana.
Los Ermanos muzulmanos en sus memorándum enterno de 1991 avian demandado a los islamistos de aparejar un plano para la destruksyon de la sivilizasyon oksidentala koza ke da a entender la manera de propaganda ke oy azen en el oksidente los revoltones Hamas i Hezbollah kon el ayudo finansaryo del Katar i del Iran. Eyos uzan aktivistos para organizar protestos i demostrasyones en los payizes oksidentales kontra Israel. Los aktivistos bien pagados no les importa de desestabilizar sus propyos payizes lo ke les importa aparte del dinero es de mirar a ke el ideal sosyalisto no desapareska. Bien entendido las minoridades muzulmanas de estos payizes por lo mas miran de ayudar los aktivistos por la simple razón de sus inimista kontra Israel i sus dezeyos de ayudar el Hamas. En kurto diremos ke estos aktivistos oksidentales son antisemitos muy danjorozos ke refuzan la egzistensya de Israel. Ni las komunidades djudiyas ni los governos oksidentales malgrado todas las prekosyones ke toman no son kapaches de blokar las malas echas de estos aktivistos ke se sienten protejados grasias a las leyes demokratikas.
Es ansi ke en las kayes de NuevaYork, Londra, Sidney, Paris, Bruksel i mas se ve una grande djentorya gritando ‘glorya a los martiryos’, embrujados de keffiyes, tenyendo en mano bandieras palestinianas i alavando ‘la intifada’ kon pankartas. Sus butos no es Gaza ma sukestrar la sivilizasyon en kulpabilizando Israel de djenosidio i pormo de esto a kondanarlo a espareser.
Ademas gazeteros renomados, profesores de universidades kritikaron la moralidad de Israel durante el tiempo de gerra, dando komo eshemplo los viejos pilotes ke refuzaron de kerer kombatir en Gaza por razones etikas. Ma ‘moralita sin koraje es entregarse al inimigo’ dizen los savyos. Eyos pensan ke el Hamas esta vensido i ke Israel devra arestar la gerra en dando el kontrol de la banda a aktores internasyonales. Ma estos sinyores saven ke esto no es posivle tanto ke los 53 arevatados no son liberados i ke si Israel mira de destruyir militarmente el Hamas es para ke sus sivdadinos no sean mas matados en sus kamas i ke sus kreaturas no sean kemadas bivas. No ay duvda dizen estos sinyores ke si la gerra de Gaza se alarga esto provokara muncho mas antisemtimizmo. Komo no responderles en diziendoles ke si los djudyos no se defenden eyos mizmo el mundo no lo va kerer mas bien i lo konsiderara komo paria. Solo si los djudyos se están en pies bien derechos serán respektados visto ke la komunidad internasyonala no kere ver djudyos pasivos de los siglos pasados, paso la moda del amanziamyento.
El puevlo djudyo no va demandar mas piyadad para sobrebivir, no se ira en las kamaretas de gas de la istorya, al kontraryo kontinuara su egzistensya para alumbrar la sivilizasyon moderno kon su saverisyo i sus inovasyones.
Por el Dr. Selim Salti
コメント