LA VYEJA KERE BİVİR PARA MAS VER İ OYİR

Despues de un largo invyerno, apoko apoko ya esta vinyendo enverano,

lo mas muncho ke me plaze es, los diyas alargan i komo me alevanto

denprano, veyo el amaneser. Porke invyerno kuando tomo el kafe de

demanyana lo bevo enfrente el lunar.

Esta sezon ya empesamos a pensar las vakansas i la kampanya. En la

kampanya lo mas ke me plaze es las demanyanas i la kayades.

Respiras un averiko limpyo, las rozikas avren akea ora i los paşarikos

apozan en un brote chuflan komo una kantika de amor. Por siguro las

islas mas no son las izlas de antes, seya la djente, seya el transporte.

Antes, kuando pasava una talika, la boz ke saliya de las nalchas de los

kavayos me dava iluzyon ke esto en otro syeklo. Akeas oras pensava,

sera ermozo de bivir syen anyos antes, vistir fostanes largos, chapeyos

elegantes, gantes de dantela i azer el torno grande kon talika.

Ma ay unos kuantos anyos ke se alevanto las talikas de sorte i las

bozes de las nalchas no estamos oyendo. Agora estamos kaminando

kon otobuses i taksis de elektrisite, el torno de la ada ke era kaji una ora

lo estamos azyendo en kinze puntos, por siguro ke para mozos los

vyejos moradores de las islas no es el mezmo plazer.

Mozos semos una jenerasyon ke bivimos lo vyejo i lo muevo endjuntos,

si el dyo mos da vidas ken save kualo mas va mos a ver. Ma sigun mi,

kale auzar a lo muevo si no, no puedemos ser aktual.

Ken diziya ke kon un telefon entelijente, pizando a una tush, ivamos

avlar kon la Amerika, una boda, una fyesta, mezmo un funeral lo

estamos vyendo a punto en zoom. Atras 40 anyos yo en la kampanya no

teniya telefon de kaza, fuimos ovligados de asperar kuatro sinko anyos

para ke mos venga el torno. El ir vinir a la ada era un evento. La frijider

yena de vidreriya, la makina de lavar yena de kalsados, kamas, kolchas i

kolchones, chantas yenas. Solo la radyo i kozas de valor viniyan a la

tadre kon el balabay. Komo troko la vida. Kuando aviyamos visto el filmo

de James Bond aviyamos kedado kuryozas ke kon un boton estava

vyendo ken vino a la puerta de abasho. Agora lo tenemos en kada kaza i

kuando sona la puerta vemos ken vino. Komo estos miles de egzemplos.

Troko la vida, troko i las ideas mezmo., al tyempo kazar kon una

persona non djudyo era fin de mundo era kortar kriya. Agora kuando

mos avizan un espozoryo u un kazamyento mezmo ke no aprobamos

demandamos.

- Ken son los koshuegros?

la repuesta es

- No los konoses

Ya entendemos de vista le dizimos

- Mazaltov bueno ke pasen.

Por egzemplo una si dize,

- Tal mansevo es gay,

- Es su preferensya seksual,

- Tu ıjo ya kazo?

- No, no se kazaron estan bivyendo endjuntos,

- Orozos ke esten,

- Dospues de vente anyos se kitaron

- Si no estavan orozos muy bueno izyeron

- La novya entro al kal la tripa en la boka,

- Mazaltov bravo te vas azer nona en presto.

Veremos mas a kualo mos vamos a auzar.

Alegres ke estesh.

Forti BAROKAS

Bağış/Donation/תרומה

Apretar al boton para ver todos los eskritos