(Teksto-Audio)
Achakes de las fiestas del muevo anyo 5784, en los diyas pasados mas de 15 milyones de djudyos a traverso el mundo mandaron milyones de WhatsApp para felisitarsen i ogurarsen suetos de sanedad, de vidas largas, de repozo i de pas, kon bezos i abrassos. Si ajustamos a esto las munchisimas yamadas telefonikas durante la semana de Rosh Ashana mos rendemos kuento ke el puevlo djudyo, en muestra epoka se siente orozo, aksyon ke mostra kon amista la unyon ke egziste a los niveles familiales, profesionales, politikos i mas.
Es de kustumbre ke en kada empesijo de anyo se publikan en Israel datas de statiska ke mos dan una idea justa de la vida del payis. A la fin del anyo pasado serka 9.8 milyones de almas bivian en Israel kuantidad ke pujara verso la fin del anyo en korso a 10 milyones. Koza ke reprezenta 10 tantos mas del anyo de su fondasyon. Ademas verso la fin de 2048 se aspera a ke la povlasyon de Israel será de 15 milyones.
De los serka 9.8 milyones de sivdadinos 7.2 milyones (73%) son djudyos i serka 2.1 miliones (21%) son arabos. A esto se ajustan 549.000 personas ke apartienen a otras relijiones. Durante el anyo 2022 74.000 muevos olim(imigrante) se establisieron en Israel, kuantidad de djudyos ke se ajuntaron a los 3.4 miliones de viejos olim. En totalidad la povlasyon pujo de 194.000 almas lo ke representa una ogmantasyon de 2%; donde 172.000 muevos nasidos. La norma medya de la mujer israeliana es de 3 kreaturas, muncho mas alta de la evropeya ke es de 1.6 kreaturas solo. No olvidar ke 16.800 israelianos ekspatriyados retornaron en 2022 a bivir en el payis, lo ke prova ke malgrado la inflasyon la ekonomiya se mantiene en buen estado.
De oltra parte durante 2022 los 22.8 % de la fatalidad fue kavzada por el kanser i 9.5 % achakes de la Korona. Israel poseda en sus ospidales 1.7 kamas i 4.8 infirmyeros por 1000 sivdadinos. El 80 % de los israelianos aedados de mas de 20 anyos se sienten sanos i no nesesitan un kudyo regular. 1.914.700 elevos chikos i de segundo nivel de edukasyon estudian en eskolas del governo. 1.118.900 en eskolas primeras i 795.800 en sekondaryas kon 884.600 en maestras. 142.000 estudyantes eskaparon en 2022 estudyos segondaryos lo ke representa una ogmantasyon de 7.3 % en raporto kon el anyo pasado.
La produksyon bruta por individuo de Israel (GDP) arrivo a $ 58,270 lo ke es la 13en mas alta en el mundo, kon una eksportasyon de $ 86.6 miliardas en servisyos i de $ 72.6 en produktos, ansi kreando un montante demazyado de $ 15.5 miliardas. Su armada es una de las mijores del mundo, grasias a su kapachidad de estar siempre pronta i inovativa en armamientos. Malgrado los entrompesos politikos aktuales i la vida kara 90% de los israelianos se deklaran kontentes de bivir en el payis. Malgrado los diferentes politikos internos los israelianos visto del estranjero dan una impresyon de ser unidos i kontentes de apartener a la nasyon israeliana. A todos los niveles de la sosieta israeliana se ve i se siente un kudyo atentivo sovre los djudyos del mundo i del estado de Israel, de su egzistensya i de su demokrasiya. Komo es dicho ‘kol Yisrael averim ze baze’ (Todo el puevlo de Israel es responsable de uno al otro).
Rogaremos en estos diyas santos a ke muestro D. bindicho mos dará, vidas largas, pas, sanedad, pan sin sar, fuerza para defender, días sin estrechura i ke kada djudyo ayege a realizar su dezeyo. Amen ve amen.