KUENTOS MODERNOS DE DJOHA III

KOMEMOS DESPUES

Djoha una demanyada se suve al avyon para irse a Elat, se le asenta allado el ministro de justisya. En avlando de aki de aya i aziendo konosensya, parte el avyon . Sovre esto Djoha kita de su bolsa una papelera, la avre onde se ve una sevoya chika, kezo blanko(feta), un guevo enhaminado, 2 revanadas de pan kon mues i se mete a komer. Bien entendido no manka de alikodar al ministro. Malgrado ke el ministro le dize “te rengrasyo”, el insiste en ofresiendole una revana de pan kon un medyo guevo. Sovre esto el ministro lo rengrasya de muevo i le dize ” Te dizere ke yo tengo ulser.” Sovre esto Djoha meneya la kavesa i le dize “ Sinyor ministro tu kome este guevo en primero después mos partajamos tu ulser!”

GERRA I PAS

Djoha en una reunión de akademisyenes konto diziendo ke el meldo muncho, un mabul de livros, sovre esto uno de los prezentes kuryozamente le pregunta “ Eske meldates el livro Gerra i Pas?” “No” responde Djoha “ Es kontra mi filozofiya” “ Ke keres dizir” le demanda el sinyor. Djoha le responde “ Si azemos la gerra oy durante tres cenerasyones no se pode azer pas.” Keres dizir le dize el sinyor “La pas se aze a la tresera cenerasyon!” Djoha responde “ la gerra se repeta.”

POLVO

Djoha de su eskritoryo echa un grito a la persona ke se okupa de la limpieza “ Ke izites los polvos de ayer?Avia eskrito kon mi dedo un numero de telefon!

SHANS

Djoha se estuvo en frente de una makina ke da otomatikamente kutis de Coca. Echo un jeton i vido ke la Coca kayo, se gusto i kon plazer se metyo esta ves a echar jetones uno de detrás del otro. Un ombre ke asperava su rango se despasensyo i le disho “ Pardon sinyor ya se izo 10 Cocas kualo vaz a azer kon tantos kutis?” Djoha le respondyo “ Shisht, no te agas sintir, es mi dia de shans!”

KUENTO KONTADO POR LA SINYORA LEA OJALVO

“ Oyeme presyado, tu te keres kazar kon mi ija? Kaza tienes?” “ Si” – “ Echo tienes?” “ Si” – “ Otomobil tienes” “ Si” – “ Bueno, fumas sigaro,djugas kartas, beves alkol?” “ No sinyor” –“ Tu no tienes otras manyas?” “ Si, avlo mintiras!!”