HOŞ GELDİNİZ
- 3 saat önce
- 2 dakikada okunur
“El tyempo pasa fin ke aboltas la kara” es muy djusto. Digamos proverbo ke no es djusto no ay.
Ayer parese ke mandi mi eskrita pasada, ya paso kinze diyas i ya vino la ora de mandar la mueva. No ay remedio tanto ke apartengo una pagina so ovligada a eskrivir.
Antes de empesar a eskrivir un grande HOŞ GELDİNİZ – BRUHİM ABAİM a muestros keridos amigos YAKUP i NELLY BAROKAS. Ya pasatesh orikas malas i mozos tanbyen preokupados asperando haberes buenos, en fin de vuestra kaza ke no mankesh.
De vez en kuando me vo unos kuantos anyos atras (kaji 65 anyos). En mi çikes kuando vinia purim, era la novela ke ya viene enverano. Mi nona de la parte de mi papa mos merkava a mi i a mi ermana mavlachas de purim, korasones i sestikos yenos de dulsuryas ke se vendiyan en medio la kaleja. En la Kula, gritavan: “por aki purim! Por aki purim!” Era alegria i se viya los moedes.
La ora ke me vino al tino ke ya es ora de mandar la eskrita, estava enderechando los kashones. So bien ordenada, lo maz ke me plaze es los almaryos ke tengo los textos de teatros. Poedeser ke vos vaja riyir, yo guadro unas kozas ke para otros es bavajadas ma para mi tyene muncha valor. Por egzempyo, una letra de remersimyento, un papeliko eskrito por una amiga vieja u bien una karta de aniversaryo. El mas grande plazer mio es de mirar las datas. Munchas vezes una eskrita me aze riyir, munchas vezes me aze yorar i munchas vezes no me kreygo ke ya paso tantos anyos.
Este anyo Pesah kayo presto el primo Avril tenemos moed.
El mez de Avril mos da nuvela ke ya vyene enverano. Los diyas alargan, la natura se arebive, empesamos a azer planos de vakansas i kampanyas. El mez de Avril para mi tyene otra emportansa. Porke nasi en Avril, porke es el moed ke me plaze i mos arekoje la famiya, komemos komidas diferentes ke se kome solo en Pesah i pesah es en Avril. Es un mez diferente de los otros mezes porke bivimos la alegriya kon la tristeza en mezmo tyempo. Mos alegramos kon la salvasyon de Ayifto i ke adjuntimos la libertad. Unos kuantos diyas dospues mos atristamos kon el yom a shoah ke es el mas grande malor del puevlo djudyo. Yene en Avril komemoramos yom a zikaron por los ke muryeron en las gerras para savlar la patriya, detestamos el terorirsmo por los ke muryeron sin kulpa i sin pekado en los kales azyendo orasyon i en mezmo diya fyestamos el diya ke se fondo la republika dospues de 2000 anyos.
Este anyo es 78.en anyo estos i munchos kon pas, sin gerras i kon todos djustos AMEN.
Forti BAROKAS
Es ke meldatesh la eskrita de una semana antes?
Yorumlar