EMIGRASYON KLANDESTINA

Mi amigo el avogado Yakup Barokas viene de publikar un livro en turko entitolado TÜRKİYE ÜZERİNDEN YASADIŞI GÖÇ (Emigrasyon Klandestina a Traverso la Turkiya) ke konta el fakto istoriko de los djudyos mirando de eskabuyir de los nazistos biviendo en la Evropea oryantala. Rekordo muy importante dando a entender las difikultades kon las kualas estos poveretos miraron de fuyir de la muerte kon barkas primitivas a traverso la mar Preta i ayegar a la Turkiya puerta de salvasyon.

La Turkiya komo se save en akeya epoka se avia deklarada notra, situasyon ke la avia metida en pozisyon difisil enverso la Almanya Nazista ke no keriya ke resiva refujyados fuyendo su rejim, mas espesifikamente los djudyos. Por esto, una de las razones del rejim diktatoryal de Ismet Inonu i de su governo era de nunka kerer achetar klandestinos djudyos arivando a las aguas turkas, a ke debarken i kontinuan sus kaminos a traverso el payis para pasar a la Siriya i de aya a la Palestina debasho del Mandat Inglez.

Independientemente de la presyon almanda, siertos de los dirijentes turkos eran simpatizanos del rejim nazisto i bastante antisemitos, los kualos de dinguna manera no keriyan ayudar a los djudyos etranjeros. Malgrado esta inimista, magrado las difikultas de navegar en aguas danjorozas onde se undieron naves sea a chakes de las kondisyones de mar fuerte o ke fueron atakadas por vapores de guerra, en el anyo 1940 la nave nomada Salvador salyo a kamino de la sivdad de Varna en Bulgariya verso la destinasyon de la Turkiya.

El livro konta ke este vapor en data del 12 de Desembre konteniendo 352 pasajeros se undyo serka de la sivdad de Silivriya a kavza de una fuerte tempeste, en la zona del promontoryo Djambaz. 127 okupantes se aguaron por no saver nadar o se muryeron entezados del friyo. 103 personas fueron deklaradas pedridas i de los ke se muryeron los 70 de eyos eran kreaturas.

64 anyos después de este evenimiento trajiko, 5 personas ke se podyeron salvar vinyeron a Silivriya afin de komemorar este aksidente funesto. En el livro se topa ademas el reportaj ke la sinyora Nelly Barokas izo kon estos sinyores en el anyo 2004.

Yakup Barokas en su analiza mos da a entender komo la manseves djudiya de Estambol se organizo para ayudar este trafiko de klandestinos en ayudando los emisarios venidos de la Palestina los kualos ovraron en silensyo, kon la komplisita de siertas otoridades turkas ke serraron los ojoz i los decharon lavorar. Barokas mos ambeza todo esto de la boka de testigos ke bivieron en akeya epoka.

De otro lado Barokas mos aze saver en su egzamen el komporto de vela aboltada de las otoridades turkas, kuando miravan de empidir el transit i kuando se aziyan kooperatifo i mostravan una sierta umanita sovre el pasaje de los klandestinos djudyos.

Yazarın tüm yazıları için tıklayınız