EL ARTE
- Forti BAROKAS
- 7 saat önce
- 2 dakikada okunur
A ken se yama artista? Ke sinyifika ser artista verdadera?
Artista verdadera es kreativa
Kreye en si mezmo, da emportansa
Se pratika i save ke el arte es orijinal
Artista verdadera es disiplinada i pasensyoza, ay muncho ke dizir sovre el arte.
Si no egzistiya el arte, seriamos personas sin sentimyentos. İmajinavos sin pintura, sin musika, sin literatura una vida sin emosyon, sin pensar, kurto muy vaziya.
El arte tyene ekeftos pozitivos. Por empesar un pintor en pintando, un eskrivano en eskrivyendo amostra su mundo interior esta manera apoya su salud mental.
Una de las kontribusyones mas emportantes del arte es, ayudar a konoser muestros sentimyentos i pensamyentos.
El arte entretyene las personas, da lisyones de vida i aze pasar el tyempo en bueno.
Las syete ramas del arte son, arkitektura, estatua, pintura, literatura, musika, teatro i la syetena sinema.
En resumen, kreamos arte para komunikar, para edukar, para informar i evokar sentimyentos.
Dizen ke el arte no tyene edad. Yo esto dakordo, syertas amigas me demandan “ke se puede azer a muestra edad”?
Munchas kozas se puede azer, aki ay un egzemplo…
ANNA MARY ROBERTSON MOSES
“Yo me yamo Anna Mary Robertson Moses, el mundo me konose komo Granmama Moses. Yo nasi en el anyo 1860 en Nueva York. Empesi a pintar a los 76 anyos. En chika teniya dezeo de pintar. Ama la vida me ovligo a lavorar. Kuando teniya 12 anyos empesi a lavorar i a alimpyar kazas ajenas. Me kazi a los 27 anyos i pari 10 kriaturas, solo los sinko kedaron en vida. Mi vida paso en gizando, lavando i kultivando tyerra, kon silensyo i pasensya.
Kuando teniya 76 anyos mi marido muryo, los ijos kazaron, se fueron de kaza, por primera vez kedi sola. Teniya artrit i mis manos yenas de dolores. Solo en pintando no sintiya dinguna dolor. Kon los dos groshes ke teniya, fui me merki furchas empesi a pintar vistas ermozas, kavayos, el nasimyento del sol, la tradrada, la inyeve.
Estava pintando dia i noche, no por fama solo para no olvidarme de pintar.
Un dia un koleksyonaryo vido mis kuadtros tanto le plazyo todos los merko. Un poko tyempo dospues mis ovras estavan en MOMA en el museo de arte moderno.
A los 80 anyos mi foto estava en la revista LİFE.
De 76 asta los 100 anyos pinti mas de 2000 tablos.
Durante este tyempo entendi ke munchas kozas mos keda aryento fin ke avrimos la puerta.
Si la alma tyene kolor nunka no es tadre i nunka ovidesh ke el arte no tyene edad”. Granmama MOSES.
Forti BAROKAS
Es ke meldatesh la eskrita de una semana antes?
Yorumlar