HANUKA
- TÜRKİYELİLER BİRLİĞİ התאחדות יוצאי תורכיה
.jpg/v1/fill/w_320,h_320/file.jpg)
- 7 saat önce
- 2 dakikada okunur
En el anyo 167 ( antes de Hristo) el emparator grego de Siriya ANTİOHOS EPİFANES, para destruir el djudaismo, les defendyo de azer tres mitsvot. El SHABAT, ROSH HODESH i BERİT MİLA.
Un Koen nombrado Matatyahu de la famiya Hashmonay i sus sinko ijos, konosidos komo “Makabi”, se revoltaron i realizaron una revolusyon. En tres anyos, los djudyos se salvaron de sus enemigos. Esta viktorya fue un grande miraklo.
Kuando rekuperaron el kontrol del Bet-Amikdash, kerian asender la Menora kontinualmente i para esto teniyan de menester azete de oliva pura. Ma la kantita de azete ke tenian abastava solo para un dia.
Un miraklo, la menora asendyo ocho dias.
En memorya de esta nes, mozos los djudyos kada anyo el 25 Kislev selebramos la fyesta de Hanuka i durante ocho dias asendemos kandelas en el kandelar nombrado Hanukiya.
Yo kreyo muncho a los miraklos, tengo munchos egzemplos. Alora vos kontare una istorya talmudik ke mo la konto en una lisyon, el defondo Hahambashi Rav İsak Haleva.
En una ora byen tadre de la noche, un otobus toma kamino de Tel Aviv a Yerushalayim. Unos de los pasajeros estavan durmyendo, otros despasensyados por arivar a sus kazas una ora mas antes. Komo era una ora byen tadre de la noche, los kaminos estavan asolados i oskuros. El shofor kansado de ir i vinir este kamino diya entero, estava orozo ke es el servisyo de alkavo i pensando ke va arivar a su kaza i va reunir su famiya. Apenas una ora ke tomaron kamino, un vyejiziko kon barva blanka salyo delantre del otobus dizyondole al shofor kon las manos de kedarse. Siguro el shofor kuryozo areto el otobus. Todos los pasajeros en panik, ken kijo abashar ken kon espanto i ken dizyondele al shofor ke tome kamino. El vyejiziko insistyendo i gritando estava demandando piyadades. El shofor ovligado kedo de konduizir, avyo las puertas i le demando;
“ke keres estas oras de la noche”?
el vyejo kon una boz triste le respondyo
“ay un hazino muy perso, aki no ay ni doktor ni ospital si asperas unos kuantos minutos lo va trayer al hazino kualo ay no tomes kamino fin ke vengo”.
Todos los pasajeros kuando oyeron la razon le disheron al shofor no ay remedyo devemos de asperar .
El shofor ke ya estava byen kansado metyo la kavesa enriva la direksyon, disho a lo manko fin ke vyene el hazino me durmere ke repozen mis ojos.
Paso medya ora, una ora, dos oras, ya amanesyo, ni el vyejo no esta por enmedyo ni el hazino ke disho, a la fin los pasajeros se desesperaron i fueron a dizirle al shofor ke se desperte i ke tome kamino. Lo yaman, lo meneyan, el shofor no sesta despertando. Malorozamente una kriza kardiak, el povereto ya estava muerto.
Kuando amanesyo los pasajeros ven ke ande estan no ay ni kazas, ni moradas, ni personas, ni arvoles mezmo.
Si Dyo no mandava a este mallah, el shofor en konduizando se iva murir i en mezmo tyempo iva kavzar la muerte de 40 personas ke estavan en el otobüs.
Syempre tendramos miraklos
HANUKA SAMEAH.
Forti BAROKAS
Es ke meldatesh la eskrita de una semana antes?
Yorumlar