«EL ANJELO DE BASTOGNE»
Eya, dava a komer a los ke no puedian tomar kuchara en la mano, Eya, akonpanyava las noches a los ke no se puedian alevantar, Eya estuvo allado de los firidos en la oskuridad Eya, era el anjelo de Bastogne.
En el anyo 1944 el mez de Desembre, en Bastogne (Bastogne, es una sivdad en la provensya de Luxemburg, aryento la rejyon Valon, del sud de Beljika).
La division Aerotransportada numero 101, fue atrapada por un Panzer Alman i kayo a estas tyerras en ora de una inyeve terible. Los soldados kedaron sin alimentos, no teniyan de komer, sus rezervas eskapo i sus nesesidades medikos no eran sufizantes para kurar los firidos.
En ete estado, una infermyera de trenta anyos nombrada Renee Lemair, lavoro benevol para salvar la vida de kaji 100 soldados. Esta mujer no era ni soldado ni teniya dinguna arma en su mano, peno diyas i noches por estos soldados firidos ke estavan leshos de sus kazas i de sus famiyas.
Renee, era una infermyera profesyonel ke meldo en Bruksel. Eya i su famiya vinyeron a azer vakansa a Bastogne ma malorozamente su vakansa eskapo el 16 Desembre, kuando los Almanes atakaron esta sivdad. Eya, al lugar de fuir de aya i salvar su vida, en Rue de Neufchateau, en el budrum de un magazen, formado komo ospital militer, empeso a lavorar voluntarya para salvar los soldados. Las kondisyones no estavan muy famozas. Los firidos estavan enbasho, el lugar estava suzyo i golyendo de sangre.
Komo no aviya bastante materyales para los firidos, Renee, tomo todas las ropas del magazen i las izo bandajes ansi parvino a aretar las emorajiyas i salvo kuantas almas.
Una noche en areskuro un soldado firido le detuvo la mano i le disho
“Enfermyera, te rogo no mos deshes solos”
Eya le respondyo kon kerensya i le disho;
“ No te merikiyes esto aki kon ti i kon todos fin ke me muero”
Renee lavoro endjuntos kon DR. JACK PRİOR i una infermyera nasida en Kongo nombrada AUGUSTA.
Este trio sin tener alimentos medikales parvinyeron a salvar almas i almas.
Entremyentes el novyo djudyo de Renee, fue aferrado por la Gestapo. Malgrado su tristeza eya kontinuo a salvar soldados.
Una demanyana en el depo del magazen vido un parashut de seda blanko. De vista lo tomo i kon alegriya lo yevo allado de sus koleges i les disho:
“kuando va eskapar la gerra, de esta seda me va azer un fostan de novya”
En un mundo yeno de armas i de sangres esta idea era una chika esperansa para Renee.
El 24 Desembre a la ora 20.30 una mala bomba Almana kayo djusto al edifisyo ke formaron komo ospital para salvar soldados firidos. De vista salyo un fuego i se kemaron mas de 50 personas. Renee koryo al budrum empeso a kitar a los ke estan bivos, fue i vino kaji 6 vezes i salvo 6 soldados, a la syetena vez malorozamente kayo el techo i povereta Renee kedo debasho i muryo.
Kuando se amato el fuego el Dr.PRİOR topo el puerpo kemado de Renee, komo no aviya una mortaja la emburujo a la seda blanka del parashut ke aviya guadrado para su boda i la entrego a su famiya.
Oy en diya RENEE LEMAİRE es onorada kon el nombre
“EL ANGELO DE BASTOGNE”.
En el treser anyo del 7 de octobre, vos oguro una invyernada buena yena de pas i amistad i digo
“nunka mas».
Forti BAROKAS
Es ke meldatesh la eskrita de una semana antes?
Yorumlar